آنکھوں نے بہت دن سے قیامت نہیں دیکھی — اسد بدایونی
شاعر
آنکھوں نے بہت دن سے قیامت نہیں دیکھی
آنکھوں نے بہت دن سے قیامت نہیں دیکھی
مدت ہوئی اچھی کوئی صورت نہیں دیکھی
چہروں کی طرح کس لیے مرجھائے ہوئے ہیں
پھولوں نے تو ہم جیسی مصیبت نہیں دیکھی
وہ شہر سے گزرا تھا فقط یاد ہے اتنا
پھر کوئی بھی دستار سلامت نہیں دیکھی
لوٹے جو مسافت سے تو میں اس سے یہ پوچھوں
بستی تو کوئی راہ میں غارت نہیں دیکھی
گرتے ہوئے پتوں کی صدائیں مرے دل سے
کہتی ہیں کہ تو نے کوئی ہجرت نہیں دیکھی
Aankhon ne bahut din se qayamat nahin dekhi
Aankhon ne bahut din se qayamat nahin dekhi
Muddat hui achhi koi surat nahin dekhi
Chehron ki tarah kis liye murjhaye hue hain
Phoolon ne to hum jaisi museebat nahin dekhi
Wo shahr se guzra tha faqat yaad hai itna
Phir koi bhi dastar salamat nahin dekhi
Laute jo musafat se to main us se ye poochhun
Basti to koi rah mein gharat nahin dekhi
Girte hue patton ki sadaen mere dil se
Kahti hain ki tu ne koi hijrat nahin dekhi