عجب دن تھے کہ ان آنکھوں میں کوئی خواب رہتا تھا — اسد بدایونی
شاعر
عجب دن تھے کہ ان آنکھوں میں کوئی خواب رہتا تھا
عجب دن تھے کہ ان آنکھوں میں کوئی خواب رہتا تھا
کبھی حاصل ہمیں خس خانہ و برفاب رہتا تھا
ابھرنا ڈوبنا اب کشتیوں کا ہم کہاں دیکھیں
وہ دریا کیا ہوا جس میں سدا گرداب رہتا تھا
وہ سورج سو گیا ہے برف زاروں میں کہیں جا کر
دھڑکتا رات دن جس سے دل بیتاب رہتا تھا
جسے پڑھتے تو یاد آتا تھا تیرا پھول سا چہرہ
ہماری سب کتابوں میں اک ایسا باب رہتا تھا
سہانے موسموں میں اس کی طغیانی قیامت تھی
جو دریا گرمیوں کی دھوپ میں پایاب رہتا تھا
Ajab din the ke in aankhon mein koi khwab rehta tha
Ajab din the ke in aankhon mein koi khwab rehta tha
Kabhi hasil hamein khas-khana o barf-aab rehta tha
Ubharna doobna ab kashtiyon ka hum kahan dekhein
Wo darya kya hua jis mein sada gardaab rehta tha
Wo suraj so gaya hai barf-zaron mein kahin ja kar
Dhadakta raat din jis se dil-e-betaab rehta tha
Jise padhte to yaad aata tha tera phool sa chehra
Hamari sab kitabon mein ek aisa baab rehta tha
Suhane mausamon mein us ki tughyani qayamat thi
Jo darya garmiyon ki dhoop mein payab rehta tha