بڑے نادان تھے ہم ریت کو آب رواں سمجھے — اسد بدایونی
شاعر
بڑے نادان تھے ہم ریت کو آب رواں سمجھے
بڑے نادان تھے ہم ریت کو آب رواں سمجھے
کھجوروں کے درختوں کو گھنیرا سائباں سمجھے
چمن میں میرے آنسو تھے جنہیں شبنم کہا سب نے
فلک پر میری آہیں تھیں جنہیں سب کہکشاں سمجھے
کبھی تجھ کو غبار رنگ میں کوئی کرن جانا
کبھی تجھ کو گرفت سنگ میں جوئے رواں سمجھے
کسی بے مہر صبحوں کو عطا کی روشنی ہم نے
کئی نا مہرباں راتوں کو بھی ہم مہرباں سمجھے
خزاں کے شہر میں بس میں بہاروں کی علامت تھا
مرے زخموں کو سب پھولوں کی نازک پتیاں سمجھے
سبھی کو دے رہا تھا وہ دعا جینے کی صدیوں تک
ہمارے شہر کے سب لوگ اس کو بد زباں سمجھے
تھکے بیٹھے تھے کچھ پنچھی لب دریا جنہیں اسعدؔ
ہم اپنی پر شکستہ خواہشوں کا کارواں سمجھے
Bade nadan the hum ret ko aab-e-rawan samjhe
Bade nadan the hum ret ko aab-e-rawan samjhe
Khajooron ke darakhton ko ghanera sayeban samjhe
Chaman mein mere aansu the jinhein shabnam kaha sab ne
Falak par meri aahen thin jinhein sab kahkashan samjhe
Kabhi tujh ko ghubar-e-rang mein koi kiran jaana
Kabhi tujh ko giraft-e-sang mein ju-e-rawan samjhe
Kisi be-mehar subhon ko ata ki roshni hum ne
Kai na-meharban raaton ko bhi hum meharban samjhe
Khizan ke shahr mein bas mein baharon ki alamat tha
Mere zakhmon ko sab phoolon ki nazuk pattiyan samjhe
Sabhi ko de raha tha wo dua jeene ki sadiyon tak
Hamare shahr ke sab log is ko bad-zaban samjhe
Thake baithe the kuchh panchhi lab-e-dariya jinhein Asad
Hum apni par-shikasta khwahishon ka karwan samjhe