سخن وری کا بہانہ بناتا رہتا ہوں — اسد بدایونی
شاعر
سخن وری کا بہانہ بناتا رہتا ہوں
سخن وری کا بہانہ بناتا رہتا ہوں
ترا فسانہ تجھی کو سناتا رہتا ہوں
میں اپنے آپ سے شرمندہ ہوں نہ دنیا سے
جو دل میں آتا ہے ہونٹوں پہ لاتا رہتا ہوں
پرانے گھر کی شکستہ چھتوں سے اکتا کر
نئے مکان کا نقشہ بناتا رہتا ہوں
مرے وجود میں آباد ہیں کئی جنگل
جہاں میں ہو کی صدائیں لگاتا رہتا ہوں
مرے خدا یہی مصروفیت بہت ہے مجھے
ترے چراغ جلاتا بجھاتا رہتا ہوں
Sukhanvarī kā bahāna banātā rahtā huuñ
Sukhanvarī kā bahāna banātā rahtā huuñ
Tirā fasāna tujhī ko sunātā rahtā huuñ
Maiñ apne aap se sharminda huuñ na duniyā se
Jo dil meñ aatā hai hoñṭoñ pe lātā rahtā huuñ
Purāne ghar kī shikasta chhatoñ se uktā kar
Nae makān kā naqsha banātā rahtā huuñ
Mere wajūd meñ ābād haiñ kaī jañgal
Jahāñ maiñ "hū" kī sadā.eñ lagātā rahtā huuñ
Mere ḳhudā yahī masrūfiyat bahut hai mujhe
Tere chirāġh jalātā bujhātā rahtā huuñ