سورج کی طرح قریۂ مہتاب میں آیا — اسد بدایونی
شاعر
سورج کی طرح قریۂ مہتاب میں آیا
سورج کی طرح قریۂ مہتاب میں آیا
رات ایک عجب شخص مرے خواب میں آیا
کیا لہر تھی جو مجھ کو لگا آئی کنارے
کس موج سے پھر حلقۂ گرداب میں آیا
یہ شہر تو صحراؤں کی سرحد پہ بسا تھا
کیسے یہ خرابہ کف سیلاب میں آیا
اک یاد سے روشن ہوئے دیوار و در و بام
خم ایک نئی طرح کا محراب میں آیا
پہلے تو دھنک رنگ میں ڈوبا افق جاں
پھر منظر ہجراں بھی تب و تاب میں آیا
اک شخص کہ یکتا تھا دریدہ دہنی میں
ذکر اس کا مگر پیار سے احباب میں آیا
Suraj ki tarah qarya-e-mahtab mein aaya
Suraj ki tarah qarya-e-mahtab mein aaya
Raat ek ajab shakhs mere khwab mein aaya
Kya lehar thi jo mujh ko laga aai kinare
Kis mauj se phir halqa-e-girdab mein aaya
Yeh shahar to sahraon ki sarhad pe basa tha
Kaise yeh kharaba kaff-e-sailab mein aaya
Ek yaad se raushan hue deewar-o-dar-o-baam
Kham ek nai tarah ka mehrab mein aaya
Pehle to dhanak rang mein dooba ufaq-e-jaan
Phir manzar-e-hijran bhi tab-o-taab mein aaya
Ek shakhs ke yakta tha dareeda-dahni mein
Zikr us ka magar pyar se ahbab mein aaya