وقت کی بازگشت سے کب یہ ہوا کہ ڈر گئے — اسد بدایونی
شاعر
وقت کی بازگشت سے کب یہ ہوا کہ ڈر گئے
وقت کی بازگشت سے کب یہ ہوا کہ ڈر گئے
درد کی دھوپ ڈھل گئی ہجر کے دن گزر گئے
تیز قدم نکل گئے دھوپ کی سرحدوں سے دور
راہ کی چھاؤں دیکھ کر سست قدم ٹھہر گئے
لوگ بھی ہیں نئے نئے شہر بھی ہیں نئے نئے
باتیں وہ کھو گئیں کہاں رستے وہ سب کدھر گئے
بارش رنگ و نور سے جان چمن میں پڑ گئی
پھول تمام کھل اٹھے پیڑ سبھی نکھر گئے
لے کے چلے تھے نرمیاں گھر سے گلوں کی صبح کو
برگ خزاں تھے شام جب لوٹ کے اپنے گھر گئے
ہم کو ہوائے وقت نے دی ہے شکست بارہا
سیپ کی طرح بند تھے گل کی طرح بکھر گئے
شعر لکھوں تو کس طرح نظم کہوں تو کیوں بھلا
میری زبان چھن گئی ہاتھ مرے کتر گئے
توڑنا تھیں روایتیں موڑنا تھیں حکایتیں
لوگ وہ خود پسند تھے ہنستے ہوئے جو مر گئے
Waqt ki baazgasht se kab ye hua ke dar gaye
Waqt ki baazgasht se kab ye hua ke dar gaye
Dard ki dhoop dhal gai hijr ke din guzar gaye
Tez qadam nikal gaye dhoop ki sarhadon se door
Raah ki chhaon dekh kar sust qadam theher gaye
Log bhi hain naye naye shehr bhi hain naye naye
Batein wo kho gain kahan raste wo sab kidhar gaye
Barish-e-rang-o-noor se jaan chaman mein pad gai
Phool tamam khil uthe ped sabhi nikhar gaye
Le ke chale the narmiyan ghar se gulon ki subh ko
Barg-e-khazan the sham jab laut ke apne ghar gaye
Hum ko hawa-e-waqt ne di hai shikast barha
Seep ki tarah band the gul ki tarah bikhar gaye
She'r likhun to kis tarah nazm kahun to kyun bhala
Meri zuban chhin gai haath mere kutar gaye
Todna thi riwayaten modna thi hikayaten
Log wo khud pasand the hanste hue jo mar gaye