بہار آئی گل افشانیوں کے دن آئے — غلام ربانی تاباں
شاعر
بہار آئی گل افشانیوں کے دن آئے
بہار آئی گل افشانیوں کے دن آئے
اٹھاؤ ساز غزل خوانیوں کے دن آئے
نگاہ شوق کی گستاخیوں کا دور آیا
دل خراب کی نادانیوں کے دن آئے
نگاہ حسن خریداریوں پہ مائل ہے
متاع شوق کی ارزانیوں کے دن آئے
مزاج عقل کی ناسازیوں کا موسم ہے
جنوں کی سلسلہ جنبانیوں کے دن آئے
سروں نے دعوت آشفتگی کا قصد کیا
دلوں میں درد کی مہمانیوں کے دن آئے
چراغ لالہ و گل کی ٹپک پڑی ہیں لویں
چمن میں پھر شرر افشانیوں کے دن آئے
بہار باعث جمعیت چمن نہ ہوئی
شمیم گل کی پریشانیوں کے دن آئے
ادھر چمن میں زر گل لٹا ادھر تاباںؔ
ہماری بے سر و سامانیوں کے دن آئے
غلام ربانی تاباں
Bahar aayi gul-afshaniyon ke din aaye
Bahar aayi gul-afshaniyon ke din aaye
Uthao saaz ghazal-khwaniyon ke din aaye
Nigah-e-shauq ki gustaakhiyon ka daur aaya
Dil-e-kharab ki nadaniyon ke din aaye
Nigah-e-husn khareedariyon pe maayil hai
Mataa-e-shauq ki arzaniyon ke din aaye
Mizaaj-e-aql ki nasaziyon ka mausam hai
Junoon ki silsila-jumbaniyon ke din aaye
Sar'on ne dawat-e-ashuftagi ka qasd kiya
Dilon mein dard ki mehmāniyon ke din aaye
Charagh-e-lala o gul ki Tapak paRi hain lau'en
Chaman mein phir sharar-afshaniyon ke din aaye
Bahar bais-e-jamiyat-e-chaman na hui
Shameem-e-gul ki pareshaniyon ke din aaye
Idhar chaman mein zar-e-gul luTa udhar Tabāñ
Hamari be-sar o samaniyon ke din aaye
شاعر کے بارے میں
غلام ربانی تاباںؔ اردو ادب کے ممتاز ترقی پسند شعرا میں شمار ہوتے ہیں جنہوں نے اپنی شاعری، تراجم اور ادبی خدمات کے ذریعے اردو زبان و ادب کو نئی فکری...
مکمل تعارف پڑھیں