اعتراف — خالد احمد

Aitraf

Baat kehna nahin aati mujhe likhna nahin aata
Satr kehne ka hunar nazm banane ka saleeqa
Baat karne ka qareena mujhe kuchh bhi nahin aata
Koi surat-e-fan arz-e-hunar aa jaye mujhe bhi
Shaam ko shaam kahoon aur nigahon pe andhere utar aaen
Subh ko subh likhoon aur pas-e-satr-e-tapan dhoop bhara din nikal aaye
Kal bhi taseer-e-tahi tha mera daman-e-sukhan aaj bhi taseer-e-tahi hai
Mera daman-e-dua sar-e-darbar-e-ata aaj bhi faizan talab hai
Mere Maula! tera banda tere ikram ke laiq nahin lekin
Mera bachpan tere inam ka shaiq hai abhi tak
Kya kahoon koi bhi shai asl pe qaem nahin rehti
Baat pairaaye ke sahra mein nikal jaye to ghar laut na paaye
Istaare ki zaban chatne aa jaye mere ajz ki shokhi mere jazbon ki hararat mere lafzon ki basarat
Har kinaya mere tapte hue jazbat tapan raakh ki jhilli ki tarah oat mein le le
Saaf shaffaf tapan raakh ki chadar
Haule haule mere jazbat ke sar tak sarak aaye
Mere Maula! mera fan bhi meri be-jaan mohabbat ki tarah nam se tahi hai
Phir bhi ae Malik-e-izzat
Jaane kyun mere gul-andam murabbi mujhe chhune pe razamand nahin hain
Jaane kyun mere gul-andam ko dar hai
Raakh ke dher mein shayad koi jazba abhi zinda ho aur is dast
Hina-rang ki porein na jhulsa de
Lafz bhoobhal ki tehain hain
Aatish-e-jazb kahin sarv-e-falak-bos ka daman na jala de
Mere Maula! mujhe kuchh bhi nahin aata
Baat karne ka hunar sher sunane ka saleeqa
Mere waris! mera seena tera ghar hai
Mere mohsin! mera ghar baab-e-kusha hai
Koi aaye mera dil baab-e-kusha hai
Lafz bhoobhal ki tehain hain
Sach to ye hai meri bhoobhal meri be-jaan mohabbat ki tarah gham se tahi hai