نور نور ذہنوں میں خوف کے اندھیرے ہیں — خالد احمد
شاعر
نور نور ذہنوں میں خوف کے اندھیرے ہیں
نور نور ذہنوں میں خوف کے اندھیرے ہیں
روشنی کے پیڑوں پر رات کے بسیرے ہیں
شہر شہر سناٹے یوں صدا کو گھیرے ہیں
جس طرح جزیروں کے پانیوں میں ڈیرے ہیں
نیند کب میسر ہے جاگنا مقدر ہے
زلف زلف اندھیارے خم بہ خم سویرے ہیں
دل اگر کلیسا ہے غم شبیہ عیسیٰ ہے
پھول راہبہ بن کر روح نے بکھیرے ہیں
عشق کیا وفا کیا ہے وقت کیا خدا کیا ہے
ان لطیف خیموں کے سائے کیوں گھنیرے ہیں
ذوق آگہی بھی دیکھ طوق بے کسی بھی دیکھ
پاؤں میں ہیں زنجیریں ہاتھ میں پھریرے ہیں
ہو بہ ہو وہی آواز ہو بہ ہو وہی انداز
تجھ کو میں چھپاؤں کیا مجھ میں رنگ تیرے ہیں
توڑ کر حد امکاں جائے گا کہاں عرفاں
راہ میں ستاروں نے جال کیوں بکھیرے ہیں
فہم لاکھ سلجھائے وہم لاکھ الجھائے
حسن ہے حقائق کا کیا خیال میرے ہیں
ہم تو ٹھہرے دیوانے بستیوں میں ویرانے
اہل عقل کیوں خالدؔ پاگلوں کو گھیرے ہیں
خالد احمد
Noor noor zehno'n mein khauf ke andhere hain
Noor noor zehno'n mein khauf ke andhere hain
Roshni ke pedo'n par raat ke basere hain
Shahr shahr sannaate yoo'n sada ko ghere hain
Jis tarah jazeero'n ke paaniyo'n mein dere hain
Neend kab muyassar hai jaagna muqaddar hai
Zulf zulf andhiyare khum ba khum savere hain
Dil agar kalisa hai gham shabih-e-eesa hai
Phool raahiba ban kar rooh ne bikhere hain
Ishq kya wafa kya hai waqt kya khuda kya hai
In lateef khemo'n ke saaye kyo'n ghanere hain
Zauq aagahi bhi dekh tauq be-kasi bhi dekh
Paoo'n mein hain zanjeerein haath mein pharere hain
Hu ba hu wohi aawaz hu ba hu wohi andaaz
Tujh ko main chhupaoo'n kya mujh mein rang tere hain
Tod kar had-e-imkaa'n jayega kahaa'n irfaa'n
Raah mein sitaron ne jaal kyo'n bikhere hain
Fehm laakh suljhaye wehm laakh uljhaye
Husn hai haqaiq ka kya khayal mere hain
Hum to thehre deewane bastiyo'n mein veeranay
Ahl-e-aql kyo'n 'Khalid' paaglon ko ghere hain
شاعر کے بارے میں
خالد احمد جدید اردو شاعری کے اُن اہم اور معتبر ناموں میں شمار ہوتے ہیں جنہوں نے غزل، نثر، تنقید اور ڈرامہ نگاری کے میدان میں نمایاں خدمات انجام دیں...
مکمل تعارف پڑھیں