پتھر سے کیا شکل نکالے یہ ہم کیا جانیں — خالد احمد
شاعر
پتھر سے کیا شکل نکالے یہ ہم کیا جانیں
پتھر سے کیا شکل نکالے یہ ہم کیا جانیں
آذر کس پیکر میں ڈھالے یہ ہم کیا جانیں
کون ہوا کا ہاتھ بڑھائے ناؤ الٹ جائے
دریا کودے کون اچھالے یہ ہم کیا جانیں
نیند بھرے ہلکورے لیں راتیں کس کے ہاتھوں
کون چراغ صبح اجالے یہ ہم کیا جانیں
کیا کہئے کس زہر کی کاٹ رگوں میں پھرتی ہے
کس نے بجھائے زہر میں بھالے یہ ہم کیا جانیں
اک پانی کی اوٹ میں ساری دنیا بستی ہے
کس نے بھرے آنکھوں کے پیالے یہ ہم کیا جانیں
کھوئی ہوئی بھیڑیں ہیں ہم جانے کس گلے کی
کس دن آ جائیں رکھوالے یہ ہم کیا جانیں
ہر دن اس کا ہر شب اس کی ہر موسم اس کا
کس نے تنے آنکھوں پر جالے یہ ہم کیا جانیں
ان ہاتھوں کی چھاؤں میسر آئے گی کب تک
کس دن پیڑ یہ چھاؤں اٹھا لے یہ ہم کیا جانیں
سات ستارے انگ تمہارے پلک پلک تارے
کس نے جگائے یہ اجیالے یہ ہم کیا جانیں
موت کی نیند سلا دے خالدؔ کن ہاتھوں کی تھپک
نیزوں پر سر کون اچھالے یہ ہم کیا جانیں
خالد احمد
Patthar se kya shakl nikale ye hum kya jaanein
Patthar se kya shakl nikale ye hum kya jaanein
Aazar kis paikar mein dhale ye hum kya jaanein
Kaun hawa ka haath barhae naao ult jaye
Darya koode kaun uchhale ye hum kya jaanein
Neend bhare halkore len raatein kis ke hathon
Kaun chirag-e-subh ujale ye hum kya jaanein
Kya kahiye kis zehr ki kaat ragon mein phirti hai
Kis ne bujhae zehr mein bhale ye hum kya jaanein
Ik paani ki oat mein saari duniya basti hai
Kis ne bhare aankhon ke piyale ye hum kya jaanein
Khoi hui bheren hain hum jaane kis gale ki
Kis din aa jaen rakhwale ye hum kya jaanein
Har din us ka har shab us ki har mausam us ka
Kis ne tane aankhon par jaale ye hum kya jaanein
In hathon ki chhaon mayassar aaegi kab tak
Kis din per ye chhaon utha le ye hum kya jaanein
Saat sitare ang tumhare palak palak tare
Kis ne jagae ye ujale ye hum kya jaanein
Maut ki neend sula de Khalid! kin hathon ki thapak
Nezon par sar kaun uchhale ye hum kya jaanein
شاعر کے بارے میں
خالد احمد جدید اردو شاعری کے اُن اہم اور معتبر ناموں میں شمار ہوتے ہیں جنہوں نے غزل، نثر، تنقید اور ڈرامہ نگاری کے میدان میں نمایاں خدمات انجام دیں...
مکمل تعارف پڑھیں