ربط کس سے تھا کسے کس کا شناسا کون تھا — خالد احمد
شاعر
ربط کس سے تھا کسے کس کا شناسا کون تھا
ربط کس سے تھا کسے کس کا شناسا کون تھا
شہر بھر تنہا تھا لیکن مجھ سا تنہا کون تھا
میں سمندر تھا مگر ویراں تھا صحرا کی طرح
میرے گھر تک چل کے آتا اتنا پیاسا کون تھا
ریزۂ سنگ انا تھا راہ کا کوہ گراں
بڑھ کے لگ جاتا مرے سینے سے ایسا کون تھا
سطح پر خاموشیوں کی گونج ہے نوحہ کناں
اپنی گہرائی کے دریا میں جو ڈوبا کون تھا
ذات آخر ذات تھی شہکار پھر شہکار تھی
کس کے فن کے واسطے سے کس کو سمجھا کون تھا
پاؤں دھرتی پر تھے لیکن ذہن تھے آکاش پر
سب کے سب میری طرح بکھرے تھے یکجا کون تھا
کچھ برے تھے کچھ بھلے تھے خار کچھ گل زار کچھ
ہر کوئی انسان تھا آخر فرشتہ کون تھا
وہ بھڑک اٹھا تو خالدؔ سوچتا ہی رہ گیا
خوب رو پیکر کے اندر تند خو سا کون تھا
خالد احمد
Rabt kis se tha kise kis ka shanaasa kaun tha
Rabt kis se tha kise kis ka shanaasa kaun tha
Shehr bhar tanhaa tha lekin mujh sa tanhaa kaun tha
Main samandar tha magar veeraan tha sahra ki tarah
Mere ghar tak chal ke aata itna pyaasa kaun tha
Reza-e-sang-e-ana tha raah ka koh-e-giraan
Baṛh ke lag jaata mere seene se aisa kaun tha
Satah par khamoshiyon ki goonj hai nauha kunaan
Apni gehraayi ke darya mein jo dooba kaun tha
Zaat aakhir zaat thi shahkaar phir shahkaar thi
Kis ke fan ke waaste se kis ko samjha kaun tha
Paaon dharti par the lekin zehan the aakaash par
Sab ke sab meri tarah bikhre the yakja kaun tha
Kuchh bure the kuchh bhale the khaar kuchh gulzaar kuchh
Har koi insaan tha aakhir farishta kaun tha
Woh bhaṛak uṭha to Khalid! sochta hi reh gaya
Khoob-roo paikar ke andar tund-kho sa kaun tha
شاعر کے بارے میں
خالد احمد جدید اردو شاعری کے اُن اہم اور معتبر ناموں میں شمار ہوتے ہیں جنہوں نے غزل، نثر، تنقید اور ڈرامہ نگاری کے میدان میں نمایاں خدمات انجام دیں...
مکمل تعارف پڑھیں