ستم طراز تلک زخم آشنا بھی تو ہو — خالد احمد
شاعر
ستم طراز تلک زخم آشنا بھی تو ہو
ستم طراز تلک زخم آشنا بھی تو ہو
افق افق شفق درد کی حنا بھی تو ہو
خلا بہ پا ہوں مگر دشت دشت خاک بہ سر
کچھ اپنا آپ مٹانے کی انتہا بھی تو ہو
میں خاک بن کے فضا میں بکھر بکھر جاؤں
کسی کے پاؤں تلے زینۂ صبا بھی تو ہو
ہوس کی برف بدن سے پگھل تو جائے مگر
شرر شرر کوئی پیکر کبھی چھوا بھی تو ہو
نظر نظر میں ہزاروں سوال ہیں لیکن
فلک سے کوئی مری سمت دیکھتا بھی تو ہو
نئی گھڑی نئے صحرا نئے افق لائی
کسی طرح حق آشفتگی ادا بھی تو ہو
برہنگی مرا مذہب مرا سلوک بنے
مگر بدن پہ کسی قدر کی ردا بھی تو ہو
مری وفاؤں کی گہرائیوں کا کھوج تو لے
وہ بحر حسن کبھی ظرف زما بھی تو ہو
فقط بیان حقیقت نہیں ہے منزل حق
جہت شناس وہ ہے جو جہت نما بھی تو ہو
ترے سوا بھی کسی کو کہوں ندیم مگر
ترے سوا کوئی شائستہ وفا بھی تو ہو
خالد احمد
Sitam-taraz talak zakhm-ashna bhi to ho
Sitam-taraz talak zakhm-ashna bhi to ho
Ufuq ufuq shafaq dard ki hina bhi to ho
Khala ba-pa hoon magar dasht dasht khaak ba-sar
Kuchh apna aap mitane ki intiha bhi to ho
Main khaak ban ke fiza mein bikhar bikhar jaaun
Kisi ke paon tale zeena-e-saba bhi to ho
Hawas ki barf badan se pighal to jae magar
Sharar sharar koi paikar kabhi chhuan bhi to ho
Nazar nazar mein hazaron sawal hain lekin
Falak se koi meri simt dekhta bhi to ho
Nai ghadi naye sahra naye ufuq layi
Kisi tarah haq-e-ashuftagi ada bhi to ho
Barahnagi mera mazhab mera suluk bane
Magar badan pe kisi qadar ki rida bhi to ho
Meri wafaon ki gehraiyon ka khoj to le
Woh bahr-e-husn kabhi zarf-e-zaman bhi to ho
Faqat bayan-e-haqeeqat nahin hai manzil-e-haq
Jihat shanas woh hai jo jihat numa bhi to ho
Tere siwa bhi kisi ko kahoon Nadeem magar
Tere siwa koi shaista wafa bhi to ho
شاعر کے بارے میں
خالد احمد جدید اردو شاعری کے اُن اہم اور معتبر ناموں میں شمار ہوتے ہیں جنہوں نے غزل، نثر، تنقید اور ڈرامہ نگاری کے میدان میں نمایاں خدمات انجام دیں...
مکمل تعارف پڑھیں