بدلی ہوئی ہے چرخ کی رفتار آج کل — پروین ام مشتاق

Badli hui hai charkh ki raftaar aaj kal

Badli hui hai charkh ki raftaar aaj kal
Ho band rast-goi ka bazaar aaj kal
Ilm-o-hunar hai mulk ko darkaar aaj kal
Hum khud bhale bure ke hain mukhtaar aaj kal
Hai aur hi tareeqa-e-bazaar aaj kal
Jins-e-nafees ke hain khareedaar aaj kal
Ghaflat ka daur mulk se shayad guzar gaya
Makhlooq hoti jaati hai bedaar aaj kal
Gul-goona-e-taraqqi-e-tahzeeb-o-ilm se
Shukr Khuda ke surkh hain rukhsaar aaj kal
Kyun jaante hain sana'at-o-hirfat ko bagh-e-khuld
Ghairon ki hum nigah mein hain khaar aaj kal
Roshan hai apni be-hunari aaftaab se
Hai subah ke qareeb shab-e-taar aaj kal
Bigdi hui hai mai-kada-e-dahr ki hawa
Ho jaayen shaikh ji bhi na mai-khwar aaj kal
Kya kaam in safed chirayliyon ka Hind mein
Kyun aisi shaadiyon ki hai bhar maar aaj kal
Har cheez ki girani ne veeraan kar diya
Sirf khizaan hai Hind ka gulzar aaj kal
Is baagh mein hai baad-e-khizaan-o-baad-e-qahet
Har gul ke dil mein hai khalish-e-khaar aaj kal
Bhoole hain apne farz ko ye khwajgaan-e-Hind
Haq dene mein bhi karte hain inkaar aaj kal
Shukr Khuda ke zulm se ma'zoor hai falak
Bartania hai khalq ki ghamkhwar aaj kal
Ya Rab hamare dil ko tu apni panah de
Dildaar ho gaye hain dil azaar aaj kal
Makhsoos ho chuki hain iradi ghulamiyan
Hai ek anar saikdon beemaar aaj kal
Ek ek kar ke jitne hunar the woh chhan gaye
Hum zindagi se kyun na hon bezaar aaj kal
Ek jurm aur fard-e-jaraim mein badh gaya
Ya'ni na dard-e-dil ka ho izhaar aaj kal
Jeene ki fikr keejiye aur pet ka khayal
Mauqoof keejiye ishq ka azaar aaj kal
Paabandiyan bhi chahiyein insaan ko zaroor
Aazadiyon ki kyun hai ye bhar maar aaj kal
Milta nahin kahin dahan-e-yaar hai anaaj
Faaqon se jism hai kamar-e-yaar aaj kal
Hai tangdastiyon ke sabab za'af is qadar
Sab ki hain aankhein nargis-e-beemaar aaj kal
Lakhon muhaal aqli-o-aadi sahi magar
Kasb-e-ma'aash sab se hai dushwar aaj kal
Kya keejiye tar niwaalon ka mausam nahin raha
Chupke hue hain yaar ke rukhsaar aaj kal
Faaqon se hai ye haal agar tol kar bithaayen
Aadhe ticket mein jaaye tan-e-zaar aaj kal
Gul kar diya chiragh-e-ma'eeshat to aye hawa
Ma'eda ke bhi na ghus gaye kyun khaar aaj kal
Chaaron taraf buland hai fariyaad haay haay
Maatam-kada hai qahqaha-e-deewar aaj kal
Daulat jab aayegi ke wohi cheez hum banaayen
Jo cheez chahte hon khareedaar aaj kal
Behtar hai karkhanon se ho mulk ka bhala
Uglen gadhe khazanon ko zardaar aaj kal
Sana'at ka naam ganj hai, hirfat ka naam zar
Ilm-e-shikam hai mulk ko darkaar aaj kal
Parveen ki ye dua hai rahe amn mulk mein
Rabb-e-Ghafoor tu hi hai ghamkhwar aaj kal