بہت ہی صاف و شفاف آ گیا تقدیر سے کاغذ — پروین ام مشتاق
شاعر
بہت ہی صاف و شفاف آ گیا تقدیر سے کاغذ
بہت ہی صاف و شفاف آ گیا تقدیر سے کاغذ
تمہارے واسطے لایا ہوں میں کشمیر سے کاغذ
ہوا ہے ابروئے جاناں سے دل بے تاب صد پارہ
مقابل ہو نہیں سکتا دم شمشیر سے کاغذ
اگر لوہے کے گنبد میں رکھیں گے اقربا ان کو
وہیں پہنچائے گا عاشق کسی تدبیر سے کاغذ
مری قسمت لکھی جاتی تھی جس دن میں اگر ہوتا
اڑا ہی لیتا دست کاتب تقدیر سے کاغذ
بھلا سادہ ورق پر لکھتا کیا رنگیں مزاجوں کو
منقش کر لیا تھا پہلے ہی تقدیر سے کاغذ
کچھ اس خوشبو کی حد بھی ہے معطر ہو گیا بالکل
مرے ہاتھوں میں وصف گیسوئے شب گیر سے کاغذ
عدو کا خط ہے یا تعویذ ہے جو یوں ہے سینہ پر
یہ کیوں رکھا گیا ہے عزت و توقیر سے کاغذ
خط تقدیر سے بہتر میں سمجھوں اس کو دنیا میں
تو لکھوا لائے گر قاصد بت بے پیر سے کاغذ
بتا ظالم مرے قاصد نے تیرا کیا بگاڑا تھا
جو لے کر پھاڑ ڈالا دست بے تقصیر سے کاغذ
مرے ہاتھ آ گیا پرویںؔ عدو کے نام کا خط تھا
گرا تھا رہ میں جو دست بت بے پیر سے کاغذ
Bahut hi saaf-o-shaffaf aa gaya taqdeer se kaghaz
Bahut hi saaf-o-shaffaf aa gaya taqdeer se kaghaz
Tumhare waaste laaya hun main Kashmir se kaghaz
Hua hai abroo-e-jaanan se dil-e-betaab sad-para
Muqabil ho nahin sakta dam-e-shamshir se kaghaz
Agar lohe ke gumbad mein rakhenge aqarba unko
Wahain pahunchayega aashiq kisi tadbeer se kaghaz
Meri qismat likhi jati thi jis din mein agar hota
Uda hi leta dast-e-katib-e-taqdeer se kaghaz
Bhala saada waraq par likhta kya rangeen mizajon ko
Munaqqash kar liya tha pehle hi taqdeer se kaghaz
Kuch is khushboo ki had bhi hai, muattar ho gaya bilkul
Mere hathon mein wasf-e-gesu-e-shab-geer se kaghaz
Adu ka khat hai ya ta'weez hai jo yun hai seena par
Ye kyun rakha gaya hai izzat-o-tauqeer se kaghaz
Khat-e-taqdeer se behtar main samjhun is ko duniya mein
Tu likhwa laye gar qasid but-e-be-peer se kaghaz
Bata zaalim mere qasid ne tera kya bigada tha
Jo le kar phaad daala dast-e-be-taqseer se kaghaz
Mere haath aa gaya Parveen adu ke naam ka khat tha
Gira tha reh mein jo dast-e-but-e-be-peer se kaghaz
شاعر کے بارے میں
پروین اُمِّ مشتاق اردو کی معروف شاعرہ تھیں جن کا تخلص پروین تھا، جبکہ کنیت اُمِّ مشتاق اور لقب بڑی بیگم تھا۔ وہ 11 دسمبر 1866ء کو دہلی میں ایک معزز...
مکمل تعارف پڑھیں