غیرممکن تھا چراغوں پہ گزارہ اپنا — شاہین عباس
شاعر
غیرممکن تھا چراغوں پہ گزارہ اپنا
غیرممکن تھا چراغوں پہ گزارہ اپنا
ساتھ لایا ہوں زمیں پر میں ستارہ اپنا
اب تو جس رو میں بھی ہوگی تگ و دو میں ہوگی
چشم نم چھوڑ چکی کب سے کنارہ اپنا
ایک اسی خط کم آمیز پہ سرحد اپنی
وہی اک منظر نادیدہ ہمارا اپنا
ہاتھ اک غار کے اندر سے بڑھا میری طرف
آخر اسباب سفر سر سے اتارا اپنا
یہی بندش کہ جسے دل بھی کہیں دنیا بھی
اسی اندر کی گرہ پر ہے گزارہ اپنا
اک صدا ابھری تھی سینے میں کہ پھر ڈوب گئی
قافلہ چھوٹ گیا جیسے دوبارہ اپنا
عرصۂ جاں میں سہی مہلت وحشت تو ملی
کوئی صحرا تو ہوا سارے کا سارا اپنا
Ghairmumkin tha chiraghon pe guzara apna
Ghairmumkin tha chiraghon pe guzara apna
Saath laya hoon zameen par mein sitara apna
Ab to jis ro mein bhi hogi tag-o-dau mein hogi
Chashm-e-nam chhod chuki kab se kinara apna
Ek isi khatt-e-kam-aamez pe sarhad apni
Wahi ik manzar-e-na-deeda hamara apna
Haath ik ghaar ke andar se badha meri taraf
Aakhir asbab-e-safar sar se utara apna
Yahi bandish ke jise dil bhi kahein duniya bhi
Isi andar ki girah par hai guzara apna
Ek sada ubhri thi seene mein ke phir doob gai
Qafila chhoot gaya jaise dobara apna
Arsa-e-jaan mein sahi mohlat-e-wahshat to mili
Koi sehra to hua saare ka sara apna
شاعر کے بارے میں
ِشاہین عباس 29 نومبر 1965 کو شیخوپورہ، پنجاب میں پیدا ہوئے اور انہوں نے یونیورسٹی آف انجینئرنگ اینڈ ٹیکنالوجی لاہور سے تعلیم حاصل کی۔ وہ پیشے کے ...
مکمل تعارف پڑھیں