خامشی کی طرح تیری شام میں آنا مرا — شاہین عباس
شاعر
خامشی کی طرح تیری شام میں آنا مرا
خامشی کی طرح تیری شام میں آنا مرا
ڈوبنا اک بار اور پھر ڈوبتے جانا مرا
ہم میں باغوں کی سی بے باکی کہاں سے آ گئی
یوں مہک اٹھنا تمہارا اور مہکانا مرا
تیری تنہائی کے سائے میں ہے تنہائی مری
تیرے ویرانے کی سرحد پر ہے ویرانہ مرا
اپنی اپنی خامشی میں اپنے اپنے خواب میں
مجھ کو دہرانا تمہارا تم کو دہرانا مرا
سب کا سب نقش نہایت جسم کیا اور اسم کیا
تیرا یوں مجھ کو بنانا اور بن جانا مرا
چھوڑ آنا خود کو ان آنکھوں کے پردے میں کہیں
دیکھنے پر بھی مجھے کم کم نظر آنا مرا
میرے یاں آنے سے تنہائی بڑھی ہے اور بھی
اور خالی ہو گیا ہے آئنہ خانہ مرا
Khāmoshī kī tarah terī shaam meñ aana mirā
Khāmoshī kī tarah terī shaam meñ aana mirā
Doobna ek baar aur phir doobte jaana mirā
Ham mein baaghōn kī sī be-bākī kahāñ se aa ga.ī
Yuñ mahak uThnā tumhārā aur mahakānā mirā
Terī tanhā.ī ke sāye mein hai tanhā.ī mirī
Tere vīrāne kī sarhad par hai vīrānā mirā
Apnī apnī ḳhāmoshī mein apne apne ḳhvāb mein
Mujh ko dohrānā tumhārā tum ko dohrānā mirā
Sab kā sab naqsh nihāyat jism kyā aur ism kyā
Terā yuñ mujh ko banānā aur ban jaanā mirā
Chhoṛ aanā ḳhud ko in aankhoñ ke parde meñ kahīñ
Dekhne par bhī mujhe kam kam nazar aanā mirā
Mere yaañ aane se tanhā.ī baḌhī hai aur bhī
Aur ḳhālī ho gayā hai aa.īna-ḳhāna mirā
شاعر کے بارے میں
ِشاہین عباس 29 نومبر 1965 کو شیخوپورہ، پنجاب میں پیدا ہوئے اور انہوں نے یونیورسٹی آف انجینئرنگ اینڈ ٹیکنالوجی لاہور سے تعلیم حاصل کی۔ وہ پیشے کے ...
مکمل تعارف پڑھیں