کسی آئنے پہ میں پھر نظر نہیں کر سکا — شاہین عباس
شاعر
کسی آئنے پہ میں پھر نظر نہیں کر سکا
کسی آئنے پہ میں پھر نظر نہیں کر سکا
ترے بعد کئی بھی عشق اثر نہیں کر سکا
اسے خاک پر سے گزرنا کتنا محال تھا
ترے خواب پر جو گزر بسر نہیں کر سکا
میں پلٹ کے آیا تو باغ خالی ملا مجھے
مرا انتظار کوئی شجر نہیں کر سکا
شب ہجر جیسی رواں تھی ویسی رواں رہی
میں کوئی بھی لہر ادھر ادھر نہیں کر سکا
کوئی تم سے دور بھی تھا تمہارے حضور بھی
مگر اس طرح کہ تمہیں خبر نہیں کر سکا
عجب انتشار سخن میں تھا ترے روبرو
سو میں اپنی بات کو مختصر نہیں کر سکا
مجھے پھر بھی دل کے ہی قافلے میں گنا گیا
میں اگرچہ دل کی طرح سفر نہیں کر سکا
Kisī āīne pe maiñ phir nazar nahīñ kar sakā
Kisī āīne pe maiñ phir nazar nahīñ kar sakā
Tere ba'd kaī bhī ishq asar nahīñ kar sakā
Use khāk par se guzarnā kitnā muhāl thā
Tere khwaab par jo guzar basar nahīñ kar sakā
Maiñ palaṭ ke āyā to bāgh khālī milā mujhe
Merā intizār koī shajar nahīñ kar sakā
Shab-e-hijr jaisī ravāñ thī vaisī ravāñ rahī
Maiñ koī bhī lahar idhar udhar nahīñ kar sakā
Koī tum se door bhī thā, tumhāre huzoor bhī
Magar is tarah ke tumheiñ khabar nahīñ kar sakā
Ajab intishār-e-sukhan meñ thā tere rū-ba-rū
So maiñ apnī baat ko mukhtasar nahīñ kar sakā
Mujhe phir bhī dil ke hī qāfile meñ ginā gayā
Maiñ agarche dil kī tarah safar nahīñ kar sakā
شاعر کے بارے میں
ِشاہین عباس 29 نومبر 1965 کو شیخوپورہ، پنجاب میں پیدا ہوئے اور انہوں نے یونیورسٹی آف انجینئرنگ اینڈ ٹیکنالوجی لاہور سے تعلیم حاصل کی۔ وہ پیشے کے ...
مکمل تعارف پڑھیں