بس کوئی ایسی کمی سارے سفر میں رہ گئی — عدیم ہاشمی
شاعر
بس کوئی ایسی کمی سارے سفر میں رہ گئی
بس کوئی ایسی کمی سارے سفر میں رہ گئی
جیسے کوئی چیز چلتے وقت گھر میں رہ گئی
کون یہ چلتا ہے میرے ساتھ بے جسم و صدا
چاپ یہ کس کی میری ہر رہگزر میں رہ گئی
گونجتے رہتے ہیں تنہائی میں بھی دیوار و در
کیا صدا اس نے مجھے دی تھی کہ گھر میں رہ گئی
آ رہی ہے اب بھی دروازے سے ان ہاتھوں کی باس
جذب ہو کر جن کی ہر دستک ہی در میں رہ گئی
اور تو موسم گزر کر جا چکا وادی کے پار
بس ذرا سی برف ہر سوکھے شجر میں رہ گئی
رات در یا میں پھر اک شعلہ سا چکراتا رہا
پھر کوئی جلتی ہوئی کشتی بھنور میں رہ گئی
رات بھر ہوتا رہا ہے کن خزانوں کا نزول
موتیوں کی سی جھلک ہر برگِ تر میں رہ گئی
لوٹ کر آئے نہ کیوں جاتے ہوئے لمحے عدؔیم
کیا کمی میری صدائے بے اثر میں رہ گئی
دل کھنچا رہتا ہے کیوں اس شہر کی جانب عدیم
جانے کیا شے اس کی گلیوں کے سفر میں رہ گئی
Bas koī aisī kamī sāre safar meñ rah gaī
Bas koī aisī kamī sāre safar meñ rah gaī
Jaise koī chīz chalte vaqt ghar meñ rah gaī
Kaun yeh chaltā hai mere saath be-jism-o-sadā
Chāp yeh kis kī merī har rahguzar meñ rah gaī
Goonjte rahte haiñ tanhāī meñ bhī dīvār-o-dar
Kyā sadā us ne mujhe dī thī ki ghar meñ rah gaī
Aa rahī hai ab bhī darvāze se un hāthoñ kī bās
Jazb ho kar jin kī har dastak hī dar meñ rah gaī
Aur to mausam guzar kar jā chukā vādī ke paar
Bas zarā sī barf har sūkhe shajar meñ rah gaī
Rāt daryā meñ phir ik sho'la sā chakrātā rahā
Phir koī jaltī huī kishtī bhañvar meñ rah gaī
Rāt bhar hotā rahā hai kin khazānoñ kā nuzūl
Motiyoñ kī sī jhalak har barg-e-tar meñ rah gaī
Lauṭ kar aa'e na kyuñ jāte hue lamhe Adīmؔ
Kyā kamī merī sadā-e-be-asar meñ rah gaī
Dil khinchā rahtā hai kyuñ us shahr kī jānib Adīmؔ
Jaane kyā shai us kī galiyoñ ke safar meñ rah gaī
شاعر کے بارے میں
عدیم ہاشمی اردو کے ممتاز شاعر، ادیب اور ڈرامہ نگار تھے جن کا اصل نام فصیح الدین تھا اور وہ یکم اگست 1946ء کو فیروز پور (بھارت) میں پیدا ہوئے۔ تقسیم...
مکمل تعارف پڑھیں