جو دیا تو نے ہمیں و ہ صورتِ زر رکھ لیا — عدیم ہاشمی
شاعر
جو دیا تو نے ہمیں و ہ صورتِ زر رکھ لیا
جو دیا تو نے ہمیں و ہ صورتِ زر رکھ لیا
تو نے پتھر دے دیا تو ہم نے پتھر ر کھ لیا
سسکیوں نے چار سو دیکھا کوئی ڈھارس نہ تھی
ایک تنہائی تھی اس کی گود میں سر رکھ لیا
گھٹ گیا تہذیب کے گنبد میں ہر خواہش کا دم
جنگلوں کا مور ہم نے گھر کے اندر رکھ لیا
میرے بالوں پہ سجا دی گرم صحراؤں کی دھول
اپنی آنکھوں کے لیے اس نے سمندر رکھ لیا
درز تک سے اب نہ پھوٹے گی تمنا کی پھوار
چشمۂ خواہش پہ ہم نے دل کا پتھر رکھ لیا
وہ جو اڑ کر جا چکا ہے دور میرے ہاتھ سے
اس کی اک بچھڑی نشانی، طاق میں پر رکھ لیا
دید کی جھولی کہیں خالی نہ رہ جائے عدؔیم
ہم نے آنکھوں میں تیرے جانے کا منظر رکھ لیا
پھینک دیں گلیاں برونِ صحن سب اس نے عدیم
گھر کہ جو مانگا تھا میں نے، وہ پسِ در رکھ لیا
Jo diyā tū ne hameñ woh sūrat-e-zar rakh liyā
Jo diyā tū ne hameñ woh sūrat-e-zar rakh liyā
Tū ne patthar de diyā to ham ne patthar rakh liyā
Siskiyoñ ne chār sū dekhā koī ḍhāras na thī
Ek tanhāī thī us kī god meñ sar rakh liyā
Ghaṭ gayā tahzīb ke gumbad meñ har khvāhish kā dam
Jangaloñ kā mor ham ne ghar ke andar rakh liyā
Mere bāloñ pe sajā dī garm sahrāoñ kī dhūl
Apnī āñkhoñ ke liye us ne samandar rakh liyā
Darz tak se ab na phūṭe gī tamannā kī phuvār
Chashma-e-khvāhish pe ham ne dil kā patthar rakh liyā
Woh jo uṛ kar jā chukā hai dūr mere haath se
Us kī ik bichhṛī nishānī, tāq meñ par rakh liyā
Dīd kī jholī kahīñ khālī na rah jaae Adīmؔ
Ham ne āñkhoñ meñ tere jaane kā manzar rakh liyā
Phenk dīñ galiyāñ barūn-e-sahn sab us ne Adīmؔ
Ghar ki jo māñgā thā maiñ ne, woh pas-e-dar rakh liyā
شاعر کے بارے میں
عدیم ہاشمی اردو کے ممتاز شاعر، ادیب اور ڈرامہ نگار تھے جن کا اصل نام فصیح الدین تھا اور وہ یکم اگست 1946ء کو فیروز پور (بھارت) میں پیدا ہوئے۔ تقسیم...
مکمل تعارف پڑھیں