پھر جُدائی، پھر جئے، پھر مر چلے — عدیم ہاشمی
شاعر
پھر جُدائی، پھر جئے، پھر مر چلے
پھر جُدائی، پھر جئے، پھر مر چلے
لیکن اپنے دل کی جھولی بھر چلے
بڑھ رہی ہیں خواہشیں دل کی طرف
جیسے حملے کے لیے لشکر چلے
اِنتظار اور اِنتظار اور اِنتظار
کیسے کیسے مرحلے سَر کر چلے
زندگی ساری گزاری اِس طرح
جس طرح رسّی پہ بازی گر چلے
وہ مَسل دے یا اُٹھا کر چُوم لے
پُھول اُس دہلیز پر ہم دَھر چلے
ہے کوئی ایسا مرے جیسا عدیم
اپنے دل کو مار کر ٹھوکر چلے
چال اُس کی موچ سے بدلی عدیم
سب حسیں ہلکا سا لنگڑا کر چلے
تُند خُو کا وہ رویہ تھا عدیم
دل پہ جیسے کُند سا خنجر چلے
Phir judāī, phir jiye, phir mar chale
Phir judāī, phir jiye, phir mar chale
Lekin apne dil kī jholī bhar chale
Baṛh rahī haiñ khvāhisheñ dil kī taraf
Jaise hamle ke liye lashkar chale
Intizār aur intizār aur intizār
Kaise kaise marhale sar kar chale
Zindagī sārī guzārī is tarah
Jis tarah rassī pe bāzīgar chale
Woh masal de yā uṭhā kar chūm le
Phūl us dahlīz par ham dhar chale
Hai koī aisā mere jaisā Adīmؔ
Apne dil ko mār kar ṭhokar chale
Chāl us kī moch se badlī Adīmؔ
Sab hasīñ halkā sā langṛā kar chale
Tund k͟hū kā woh ravaiyya thā Adīmؔ
Dil pe jaise kund sā khanjar chale
شاعر کے بارے میں
عدیم ہاشمی اردو کے ممتاز شاعر، ادیب اور ڈرامہ نگار تھے جن کا اصل نام فصیح الدین تھا اور وہ یکم اگست 1946ء کو فیروز پور (بھارت) میں پیدا ہوئے۔ تقسیم...
مکمل تعارف پڑھیں