تیرے لیے چلے تھے ہم تیرے لیے ٹھہر گئے — عدیم ہاشمی
شاعر
تیرے لیے چلے تھے ہم تیرے لیے ٹھہر گئے
تیرے لیے چلے تھے ہم تیرے لیے ٹھہر گئے
تو نے کہا تو جی اٹھے تو نے کہا تو مر گئے
کٹ ہی گئی جدائی بھی کب یہ ہوا کہ مر گئے
تیرے بھی دن گزر گئے میرے بھی دن گزر گئے
تو بھی کچھ اور اور ہے ہم بھی کچھ اور اور ہیں
جانے وہ تو کدھر گیا جانے وہ ہم کدھر گئے
راہوں میں ہی ملے تھے ہم راہیں نصیب بن گئیں
وہ بھی نہ اپنے گھر گیا ہم بھی نہ اپنے گھر گئے
وقت تری جدائی کا اتنا طویل ہو گیا
دل میں ترے وصال کے جتنے تھے زخم بھر گئے
ہوتا رہا مقابلہ پانی کا اور پیاس کا
صحرا امڈ امڈ پڑے دریا بپھر بپھر گئے
وہ بھی غبار خواب تھا ہم بھی غبار خواب تھے
وہ بھی کہیں بکھر گیا ہم بھی کہیں بکھر گئے
کوئی کنار آب جو بیٹھا ہوا ہے سرنگوں
کشتی کدھر چلی گئی جانے کدھر بھنور گئے
آج بھی انتظار کا وقت حنوط ہو گیا
ایسا لگا کہ حشر تک سارے ہی پل ٹھہر گئے
بارش وصل وہ ہوئی سارا غبار دھل گیا
وہ بھی نکھر نکھر گیا ہم بھی نکھر نکھر گئے
آب محیط عشق کا بحر عجیب بحر ہے
تیرے تو غرق ہو گئے ڈوبے تو پار کر گئے
اتنے قریب ہو گئے اپنے رقیب ہو گئے
وہ بھی عدیمؔ ڈر گیا ہم بھی عدیمؔ ڈر گئے
اس کے سلوک پر عدیمؔ اپنی حیات و موت ہے
وہ جو ملا تو جی اٹھے وہ نہ ملا تو مر گئے
Tere liye chale the hum tere liye thehar gaye
Tere liye chale the hum tere liye thehar gaye
Tu ne kaha to ji uthe tu ne kaha to mar gaye
Kat hi gayi judaai bhi kab yeh hua ke mar gaye
Tere bhi din guzar gaye mere bhi din guzar gaye
Tu bhi kuch aur aur hai hum bhi kuch aur aur hain
Jaane woh tu kidhar gaya jaane woh hum kidhar gaye
Raahon mein hi mile the hum raahen naseeb ban gayin
Woh bhi na apne ghar gaya hum bhi na apne ghar gaye
Waqt teri judaai ka itna taweel ho gaya
Dil mein tere visaal ke jitne the zakhm bhar gaye
Hota raha muqaabla paani ka aur pyaas ka
Sehra umad umad pade dariya biphir biphir gaye
Woh bhi ghubaar-e-khwab tha hum bhi ghubaar-e-khwab the
Woh bhi kahin bikhar gaya hum bhi kahin bikhar gaye
Koi kinaar-e-aab-e-joo baitha hua hai sar-nigoon
Kashti kidhar chali gayi jaane kidhar bhanwar gaye
Aaj bhi intizaar ka waqt hanoot ho gaya
Aisa laga ke hashr tak saare hi pal thehar gaye
Barish-e-vasl woh hui saara ghubaar dhul gaya
Woh bhi nikhar nikhar gaya hum bhi nikhar nikhar gaye
Aab-e-muheet-e-ishq ka bahr ajeeb bahr hai
Tere to gharq ho gaye doobe to paar kar gaye
Itne qareeb ho gaye apne raqeeb ho gaye
Woh bhi Adeem dar gaya hum bhi Adeem dar gaye
Us ke sulook par Adeem apni hayaat o maut hai
Woh jo mila to ji uthe woh na mila to mar gaye
شاعر کے بارے میں
عدیم ہاشمی اردو کے ممتاز شاعر، ادیب اور ڈرامہ نگار تھے جن کا اصل نام فصیح الدین تھا اور وہ یکم اگست 1946ء کو فیروز پور (بھارت) میں پیدا ہوئے۔ تقسیم...
مکمل تعارف پڑھیں