آخری صدی کے موڑ پر — قیصر الجعفری
شاعر
آخری صدی کے موڑ پر
نہ جانے زندگی کہاں ٹھہر گئی
یہ فصل انتظار بھی گزر گئی
کھلا تھا اک دریچۂ فلک نما
مگر ہوا کا راستہ بدل گیا
تمام آسماں ہوا دھواں دھواں
زمیں کا ایک ایک خواب جل گیا
کھلی ہوئی فضا میں راکھ بھر گئی
رفاقتوں کا ترجماں تھا جو لہو
وہ اس تماشا گر صدی میں بہہ گیا
وہ درد مشترک جو روشنی بنے
پگھل کے وقت کی ندی میں بہہ گیا
ندی بدن کی تہہ تلک اتر گئی
درخت اپنے پھل کو خود ہی کھا گئے
زمیں کی گود میں گرا نہ کوئی بھی
سحر کے دست ناز بے حنا رہے
دعا کی آنکھ ساری رات روئی بھی
نہ جانے وہ ہوائے شب کدھر گئی
ہوائے سرد کہہ رہی ہے دیر سے
چراغ جاں بجھا کے سو بھی جائیے
سفر میں کون پوچھتا ہے حال دل
اداسیوں کے بیچ کھو بھی جائیے
نگاہ میں جو صبح تھی وہ مر گئی
منزلوں کے خواب کا قصور کیا
پشت کی طرف جو قافلہ چلے
جو رہروان تیز پا بھٹک گئے
تو ہم بھی نامرادیاں اٹھا چلے
زمین اپنے زلزلوں سے ڈر گئی
قیصر الجعفری
Aakhri Sadi Ke Mod Par
Na jaane zindagi kahan thehar gayi
Yeh fasl-e-intezaar bhi guzar gayi
Khula tha ik daricha falak-numa
Magar hawa ka rasta badal gaya
Tamaam aasmaan hua dhuan dhuan
Zameen ka ek ek khwaab jal gaya
Khuli hui fiza mein raakh bhar gayi
Rafaqaton ka tarjumaan tha jo lahoo
Woh is tamasha-gar sadi mein beh gaya
Woh dard-e-mushtarak jo roshni bane
Pighal ke waqt ki nadi mein beh gaya
Nadi badan ki teh talak utar gayi
Darakht apne phall ko khud hi kha gaye
Zameen ki god mein gira na koi bhi
Sehar ke dast-e-naaz be-hinna rahe
Dua ki aankh saari raat royi bhi
Na jaane woh hawa-e-shab kidhar gayi
Hawa-e-sard keh rahi hai der se
Charagh-e-jaan bujha ke so bhi jaiye
Safar mein kon poochhta hai haal-e-dil
Udaasiyon ke beech kho bhi jaiye
Nigah mein jo subh thi woh mar gayi
Manzilon ke khwaab ka qasoor kya
Pusht ki taraf jo qafila chale
Jo rahrawan-e-tez-pa bhatak gaye
To hum bhi namuradiyan utha chale
Zameen apne zalzalon se dar gayi
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں