خاک پروانہ — قیصر الجعفری

Khaak-e-Parwana

Chita ko jab tera thanda badan sonpa gaya hoga
Sharare khul gaye honge dhuan lehra gaya hoga
Qaza ko sharm ke mare paseena aa gaya hoga
Yeh manzar dekhne walon se kab dekha gaya hoga
Mohabbat ke parastaaron wafa ke sogwaron ne
Nigahein pher li honge tere matam-guzaron ne
Nazare shehar-o-sahil ke pareshan ho gaye honge
Dhali hogi jo shaam-e-gham sitare so gaye honge
Shua'ein bujh gayi honge ujale kho gaye honge
Teri thandi chita par shab ke saaye ro gaye honge
Aga hoga jo poora chand dhabba ban gaya hoga
Siyah aanchal sa jamna ke kinare tan gaya hoga
Tamashe zindagi bhar tu ne soz-e-dil ke dekhe the
Ghubar-e-rah-guzar mein raaste manzil ke dekhe the
Nazare halqa-e-girdaab se sahil ke dekhe the
Teri aankhon ne jitne khwab mustaqbil ke dekhe the
Nayi paud aaj in khwabon ki zimmedaar hoti hai
Na ghabra marne wale zindagi bedaar hoti hai
Teri fikron ke dhaare beh chale Gang-o-Jamun ban ke
Tere aadarsh ne dharti ko dhanka hai gagan ban ke
Tere dil ke lahoo se khul gayi mitti chaman ban ke
Watan ka gosha gosha muskurata utha dulhan ban ke
Teri soorat kisi ko jawedaan hote nahin dekha
Kisi qatre ko itna be-karan hote nahin dekha
Teri guftaar mein baad-e-saba ki gul-fishani thi
Tere afkaar mein darya ke paani ki rawani thi
Teri tehzeeb ik ahd-e-mohabbat ki nishani thi
Teri zaat ek daur-e-jahd ki zinda kahani thi
Bahut mushkil hai koi yun watan ki jaan ho jaye
Tujhe phaila diya jaye to Hindustan ho jaye
Zameen matam-kada hai aasmaan tera aza-khana
Tere phoolon se mahke dasht-o-darya shehar-o-veerana
Hawa mein teri khushboo paaniyon mein tera afsana
Fana ho kar fana hoti nahin hai khaak-e-parwana
Kiran ban kar hareem-e-waqt ki chilman se chhanti hai
Yehi mitti simat kar phir naya parwana banti hai