اندھے پجاری — قیصر الجعفری

Andhe Pujari

Yeh kon log sar-e-maikada pahunch aaye
Chhalak raha hai lahoo hi lahoo ayaghon se
Yeh kon log hain jo zindagi ke mahalon ko
Sajane aaye hain bujhte hue charaghon se
Baras raha hai andhera jabeen ke daghon se
Yeh kon log hain jo aaftaab se chhup kar
Purani shamaon pe nazrein jamaye phirte hain
Yeh kon log hain jo irtiqaa ki manzil mein
Nayi hayaat se daaman bachaye phirte hain
Riwayaton ke janaze uthaye phirte hain
Inhein pasand nahin shaakh-e-gul ki ra'naayi
Sulook baad-e-chaman na-gawaar hai un ko
Bhatak rahe hain yeh maazi ke reig-zaron mein
Bahaar-e-nau ka tasawwur bhi baar hai un ko
Jo fasl beet chuki us se pyaar hai un ko
Bhara hai ahd-e-kuhan ka ghubaar aankhon mein
Inhein giraan hai nayi kainat ka partaw
Yeh mandiron ke pujari yeh masjidon ke imaam
Yeh teeragi ke musafir yeh raat ke rahraw
Ufaq ko nooch rahe hain ke tod lein mah-e-nau
Hawas ki qaid mein hai aabroo-e-lala-o-gul
Chaman farosh bane hain chaman ke rakhwale
Zara sambhal ke chale kaarwaan-e-rang-o-numoo
Ke khaar baithe hain phoolon ki chilmanein dale
Saba ke bhes mein phirte hain lootne wale
Yeh log halqa-e-daam-e-khayal kehte hain
Frogh-e-ilm ko science ki taraqqi ko
Yeh kam-nigah madaawa-e-dard-e-insaani
Samajh rahe hain pracheen sanskriti ko
Sadaein dete hain sadiyon ki teerah-bakhti ko
Zuban-o-firqa-o-mazhab ke ghaar mein yeh log
Hue hain gharq kuch aise ubhar nahin sakte
Uthe hain gard mein jab tak dilon ke aainey
Naye nuqoosh mein hum rang bhar nahin sakte
Nigaar-e-hind ke geesoo sanwar nahin sakte
Jalein na rooh mein jab tak muhabbaton ke charagh
Tilism teerah-khayali se hum na chhooteinge
Woh log ma'bad-e-insaaniyat ki sair karein
Jo keh rahe hain ke dair-o-haram na chhooteinge
Jo zid mein hain ke purane sanam na chhooteinge