شعلۂ حنا — قیصر الجعفری

Sho'la-e-Hina

Yeh raat mash'al-e-armaan jalane aayi hai
Magar nazar mein andhera sa chha raha hai kyun
Woh gham-kada jise thukra diya mohabbat ne
Bhula rahi hun magar yaad aa raha hai kyun
Yeh kaamyaab iraade yeh muzmahil lamhe
Yeh aaj zeest mein aakhir tazaad kaisa hai
Hujoom-e-kaif mein bhi rooh be-qarar hai kyun
Yeh iztiraab-e-dil-e-naamuraad kaisa hai
Qareeb-o-door musallat hai khamoshi lekin
Fizaaon mein kisi toofaan ka shor barpa hai
Yeh raat hai ke qayamat yeh teeragi hai ke maut
Charagh jal to gaye hain magar andhera hai
Gham-e-hayaat ki parchhaiyon se darna kya
Mai zindagi ke naye khwab ban ke aayi hun
Ab is dayar mein waapas bhi ho nahin sakti
Ke apni pusht pe deewar chun ke aayi hun
Labon pe mauj-e-tabassum hai dil mein gard-e-malaal
Mai khush to hun magar aankhon se ashk bahte hain
Meri udaas jawani ne mujh se poocha hai
Suhaag raat isi be-basi ko kehte hain
Na baap bhai ke honton pe aayi koi dua
Na maa ne pyaar se rukhsat kiya gale mil ke
Hatheliyon mein hai mehndi na maang mein afshan
Machal ke reh gaye seene mein walwale dil ke
Rah-e-hayaat ke saathi tera sahara hai
Meri wafa meri jurrat ki aabroo rakhna
Tere liye mai zamane ko chhod baithi hun
Mere ghuroor-e-mohabbat ki aabroo rakhna