فصیل شب — قیصر الجعفری

Faseel-e-Shab

Daaman-e-dil pe ghubaar-e-rah-e-manzil hai abhi
Paaye-e-afkaar mein daireena salaasil hai abhi
Teergi shola-e-ehsaas ka haasil hai abhi
Roshni qaid mein din kaat rahi hai ab tak
Tashnagi dil ka lahu chaat rahi hai ab tak
Jo nafas hai hadaf-e-dashna-e-qaatil hai abhi
Dil ke har zakhm se rasta hai ummeedon ka lahu
Regzaaron ne kiya khoon-e-bahaaraan se wuzu
Jaane kis raah mein hai qafila-e-rang-o-numoo
Ek ek shaakh shagufon se hai khaali ab tak
Maikada dhaal liya mai nahi dhaali ab tak
Na kahin raqs-e-bahaaraan hai na jashn-e-lab-e-ju
Roshni odh ke zulmat ka kafan aayi hai
Khoon mein doob ke suraj ki kiran aayi hai
Zakhm-e-jaan ban ke saba su-e-chaman aayi hai
Lab-o-rukhsaar-e-tamanna pe nikhaar aa na saka
Ahl-e-dil ko sar-e-manzil bhi qaraar aa na saka
Phir wahi rehguzar-e-daar-o-rasan aayi hai
Phir wahi khwaab-e-sehar le ke chale hain hum log
Mash'al-e-khoon-e-jigar le ke chale hain hum log
In andheron ka bharam tod ke dam lena hai
Haan, faseel-e-shab-e-gham tod ke dam lena hai
Tesha-e-fikr-o-nazar le ke chale hain hum log
Kuchh dinon kashmakash-e-jabr-o-sitam aur sahi
Kuchh dinon soz-e-daroon deeda-e-gham aur sahi
Gaam do gaam sawaad-e-shab-e-gham aur sahi
Subh-e-nau ab kisi deewar ke ghere mein nahi
Hum andhere mein hain manzil to andhere mein nahi
Itni door aaye to do chaar qadam aur sahi