اولاد — قیصر الجعفری
شاعر
اولاد
بہار آئے گی پھوٹے گی شاخ سے کونپل
شکست برگ خزاں سے یقین ہوتا ہے
جو تم ہو ساتھ تو محسوس ہو رہا ہے مجھے
خزاں نصیب چمن بھی حسین ہوتا ہے
ہتھیلیوں سے حنا تک ابھی نہ چھوٹی تھی
گلے کے پھول بھی باسی نہ ہونے پائے تھے
کہ وہ حسین و جواں سال خواب ٹوٹ گئے
سہاگ رات جو افشاں میں جگمگائے تھے
زمانہ کوکھ جلی کہہ رہا ہے کہنے دو
تمہارے ہاتھ میں قسمت کا فیصلہ تو نہیں
تمہارا کام ہے پھولوں کی آرزو کرنا
تمہارے بس میں بہاروں کا قافلہ تو نہیں
نفس نفس پہ یہ احساس تیرگی کیسا
پلک پلک میں ستارے پرو رہی ہو کیوں
تمہیں تمام چمن میں نے سونپ رکھا ہے
تم اک کلی کے لیے جان کھو رہی ہو کیوں
غریب قوم کے یہ ہونہار شہزادے
تم اپنے پیار کی رعنائیاں انہیں دے دو
تم اپنے دل کی محبت بکھیر دو ان پر
تم اپنی روح کی تنہائیاں انہیں دے دو
کہیں کھلے ہوں مگر کتنے پیارے پیارے ہیں
یہ پھول اپنے نہیں ہیں مگر ہمارے ہیں
قیصر الجعفری
Aulaad
Bahaar aayegi, phootegi shaakh se kaunpal
Shikast-e-barg-e-khizaan se yaqeen hota hai
Jo tum ho saath to mahsoos ho raha hai mujhe
Khizaan naseeb-e-chaman bhi haseen hota hai
Hatheliyon se hina tak abhi na chhooti thi
Gale ke phool bhi baasi na hone paaye the
Ke woh haseen-o-jawaan saal khwaab toot gaye
Suhaag raat jo afshaan mein jagmagaye the
Zamana kokh jali keh raha hai kehne do
Tumhaare haath mein qismat ka faisla to nahi
Tumhara kaam hai phoolon ki aarzoo karna
Tumhaare bas mein bahaaron ka qafila to nahi
Nafas nafas pe yeh ehsaas-e-teergi kaisa
Palak palak mein sitaare paro rahi ho kyon
Tumhen tamaam chaman maine sonp rakha hai
Tum ek kali ke liye jaan kho rahi ho kyon
Ghareeb qaum ke yeh honhaar shehzade
Tum apne pyaar ki ra'naaiyan inhain de do
Tum apne dil ki mohabbat bikher do in par
Tum apni rooh ki tanhaiyan inhain de do
Kahin khile hon magar kitne pyaare pyaare hain
Yeh phool apne nahi hain magar hamaare hain
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں