اجنبی لمحے — قیصر الجعفری
شاعر
اجنبی لمحے
ہوا کے دوش پر اڑتے ہوئے یہ اجنبی لمحے
کہیں ایسا نہ ہو پرچھائیاں دے کر گزر جائیں
ہمیں ڈستی ہوئی تنہائیاں دے کر گزر جائیں
ڈھلک جاتا ہے اک اک پل پہ سر سے ریشمی آنچل
کلائی میں سنہری چوڑیاں کھنکائی جاتی ہیں
چٹک اٹھتی ہوں جیسے نرم کلیاں شاخساروں پر
حنائی انگلیاں اس ناز سے چٹخائی جاتی ہیں
نشہ سا بھر دیا آنکھوں میں شرم اجنبیت نے
ادائیں اور زیادہ خوب صورت ہوتی جاتی ہیں
تعارف بے تعارف ہو چکا آؤ ہنسیں بولیں
کہ اب خاموشیاں بڑھ کر قیامت ہوتی جاتی ہیں
ملاقاتوں کے دامن میں تبسم بھی ہے آنسو بھی
قرار جاں میسر ہو کہ زخم دل ملے ہم کو
اڑے جاتے ہیں پر تولے ہوئے یہ اجنبی لمحے
خدا معلوم کس عالم میں مستقبل ملے ہم کو
مجھے تم اجنبی کہہ لو تمہیں میں اجنبی کہہ لوں
مگر اپنائیت کے تانے بانے بن رہا ہوں میں
مری خاموش نظروں کے تقاضے تم پہ واضح ہیں
تمہارے مرتعش ہونٹوں کے نغمے سن رہا ہوں میں
تمنا کے یہ لمحے جن میں گیرائی ہے صدیوں کی
ہماری روح کی خلوت سرا سے ہو کے آئے ہیں
زباں کھولو کہو میں ان حسیں لمحوں سے کیا کہہ دوں
یہ لمحے پوچھتے ہیں کیا ابھی تک ہم پرائے ہیں
ہوا کے دوش پر اڑتے ہوئے یہ اجنبی لمحے
قیصر الجعفری
Ajnabī lamhe
Havā ke dosh par uṛte hu'e yeh ajnabī lamhe
Kahīñ aisā na ho parchhāiyāñ de kar guzar jāeñ
Hameñ ḍastī huī tanhāiyāñ de kar guzar jāeñ
Ḍhalak jātā hai ik ik pal pe sar se reshmī āñchal
Kalāī mein sunahrī choṛiyāñ khankāī jātī hain
Chaṭak uṭhtī hoñ jaise narm kaliyāñ shākhsāroñ par
Hināī uñgliyāñ is nāz se chaṭkhāī jātī hain
Nasha sā bhar diyā āñkhoñ mein sharm ajnabiyat ne
Adā'eñ aur ziyāda khūbsūrat hotī jātī hain
Ta'āruf be-ta'āruf ho chukā aao hanseñ boleñ
Ki ab khāmoshiyāñ baṛh kar qayāmat hotī jātī hain
Mulāqātoñ ke dāman mein tabassum bhī hai āñsū bhī
Qarār-e-jāñ muyassar ho ki zakhm-e-dil mile ham ko
Uṛe jāte hain par tole hu'e yeh ajnabī lamhe
Khudā ma'lūm kis ālam mein mustaqbil mile ham ko
Mujhe tum ajnabī kah lo tumheñ main ajnabī kah loon
Magar apnā'iyat ke tāne bāne bun rahā hūñ main
Mirī khāmosh nazroñ ke taqāze tum pe wāzeh hain
Tumhāre murta'ish hoñṭoñ ke naghme sun rahā hūñ main
Tamannā ke yeh lamhe jin mein gehrāī hai sadiyoñ kī
Hamārī rūh kī khilvat sarā se ho ke ā'e hain
Zubāñ kholo kaho main un hasīn lamhoñ se kya kah dūñ
Yeh lamhe pūchhte hain kya abhī tak ham parā'e hain
Havā ke dosh par uṛte hu'e yeh ajnabī lamhe
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں