بجتے ہوئے گھنگھرو تھے اڑتی ہوئی تانیں تھیں — قیصر الجعفری
شاعر
بجتے ہوئے گھنگھرو تھے اڑتی ہوئی تانیں تھیں
بجتے ہوئے گھنگھرو تھے اڑتی ہوئی تانیں تھیں
پہلے انہی گلیوں میں نغموں کی دکانیں تھیں
یوں بیٹھ رہیں دل میں شوریدہ تمنائیں
گویا کسی جنگل میں پتوں کی اڑانیں تھیں
یا رب مرے ہاتھوں میں تیشہ بھی دیا ہوتا
ہر منزل ہستی میں جب اتنی چٹانیں تھیں
وہ لمحۂ لرزاں بھی دیکھا ہے سر محفل
اک شعلہ کی مٹھی میں پروانوں کی جانیں تھیں
ہم مرحلۂ غم میں تنہا تھے کہاں یارو
قاتل تھے صلیبیں تھیں تیغیں تھی سنانیں تھیں
اک حرف محبت یوں پھیلا کہ گنہ ٹھہرا
افسانے ہمارے تھے دنیا کی زبانیں تھیں
قیصر الجعفری
Bajte hue ghungroo the udti hui taanen thin
Bajte hue ghungroo the udti hui taanen thin
Pehle inhi galiyon mein naghmon ki dukanen thin
Yun baith rahin dil mein shorida tamannayen
Goya kisi jangal mein patton ki udanen thin
Ya Rabb mere hathon mein tesha bhi diya hota
Har manzil-e-hasti mein jab itni chatanein thin
Woh lamha-e-larzan bhi dekha hai sar-e-mehfil
Ik shola ki mutthi mein parwanon ki jaanen thin
Hum marhala-e-gham mein tanha the kahan yaro
Qatil the saleeben thin teghen thi sananen thin
Ek harf-e-mohabbat yun phaila ke gunah thehra
Afsanay hamare the duniya ki zubanen thin
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں