برسوں کے رت جگوں کی تھکن کھا گئی مجھے — قیصر الجعفری
شاعر
برسوں کے رت جگوں کی تھکن کھا گئی مجھے
برسوں کے رت جگوں کی تھکن کھا گئی مجھے
سورج نکل رہا تھا کہ نیند آ گئی مجھے
رکھی نہ زندگی نے مری مفلسی کی شرم
چادر بنا کے راہ میں پھیلا گئی مجھے
میں بک گیا تھا بعد میں بے صرفہ جان کر
دنیا مری دکان پہ لوٹا گئی مجھے
دریا پہ ایک طنز سمجھئے کہ تشنگی
ساحل کی سرد ریت میں دفنا گئی مجھے
اے زندگی تمام لہو رائیگاں ہوا
کس دشت بے سواد میں برسا گئی مجھے
کاغذ کا چاند رکھ دیا دنیا نے ہاتھ میں
پہلے سفر کی رات ہی راس آ گئی مجھے
کیا چیز تھی کسی کی ادائے سپردگی
بھیگے بدن کی آگ میں نہلا گئی مجھے
قیصرؔ قلم کی آگ کا احسان مند ہوں
جب انگلیاں جلیں تو غزل آ گئی مجھے
قیصر الجعفری
Barson ke ratjagon ki thakan kha gayi mujhe
Barson ke ratjagon ki thakan kha gayi mujhe
Sooraj nikal raha tha ke neend aa gayi mujhe
Rakhi na zindagi ne meri muflisi ki sharm
Chadra bana ke rah mein phailaa gayi mujhe
Main bik gaya tha baad mein be-sarfa jaan kar
Duniya meri dukaan pe lauta gayi mujhe
Darya pe ek tanz samjhe ke tishnagi
Sahil ki sard reet mein dafna gayi mujhe
Ae zindagi tamam lahoo raaigan hua
Kis dasht-e-be-suwaad mein barsa gayi mujhe
Kaghaz ka chand rakh diya duniya ne haath mein
Pehle safar ki raat hi raas aa gayi mujhe
Kya cheez thi kisi ki adaa-e-supardagi
Bheege badan ki aag mein nehla gayi mujhe
Qaisar! qalam ki aag ka ehsaan-mand hoon
Jab ungliyan jaleen to ghazal aa gayi mujhe
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں