کھنڈر — قیصر الجعفری
شاعر
کھنڈر
میں جب بھی تیرے گھر کے پاس سے ہو کر گزرتا ہوں
مجھے کھوئی ہوئی رعنائیاں آواز دیتی ہیں
تری یادیں تری پرچھائیاں آواز دیتی ہیں
یہ قفل زنگ آلودہ یہ گھر کے بند دروازے
ترے ترک وطن کا دکھ بھرا افسانہ کہتے ہیں
منڈیروں پر یہ لہراتے ہوئے پر ہول سناٹے
شکست خواب کی روداد غم دہراتے رہتے ہیں
یہاں ہر شام محرابوں میں اڑتی ہیں ابابیلیں
یہاں پچھلے پہر شبنم کے آنسو روز بہتے ہیں
شبیں آ کر گزر جاتی ہیں شمعیں تک نہیں جلتیں
سحر آ کر چلی جاتی ہے آرائش نہیں ہوتی
پس پردہ کسی آواز کے گھنگھرو نہیں بجتے
پس چلمن کسی رخسار کی تابش نہیں ہوتی
پس دیوار لہراتے نہیں اب ریشمی آنچل
پس روزن نشاط و کیف کی بارش نہیں ہوتی
وہ تلخی شدت جذبات نے بھر دی ہے رگ رگ میں
کہ تیرے غم میں رویا ہوں تو خود پر مسکرایا ہوں
جو دنیا کھو گئی میں ہوں اسی دنیا میں آوارہ
جو شمعیں نذر طوفاں ہو گئیں میں ان کا سایا ہوں
نہ جانے اجنبی بستی میں تیرا حال کیا ہوگا
میں اپنے شہر کی گلیوں میں ہوں لیکن پرایا ہوں
دیار غیر میں اب قید ہیں وہ ریشمی جلوے
جنہوں نے میری راہوں میں مہ و انجم بکھیرے ہیں
میں سمجھا تھا مری راتوں میں چمکیں گے ترے عارض
میں سمجھا تھا شہانی چوڑیوں کے گیت میرے ہیں
مگر تقسیم نے روحوں کو بھی تقسیم کر ڈالا
یہاں بھی گھپ اندھیرے ہیں وہاں بھی گھپ اندھیرے ہیں
میں جب بھی تیرے گھر کے پاس سے ہو کر گزرتا ہوں
مجھے کھوئی ہوئی رعنائیاں آواز دیتی ہیں
تری یادیں تری پرچھائیاں آواز دیتی ہیں
قیصر الجعفری
Khandar
Mai jab bhi tere ghar ke paas se ho kar guzarta hu
Mujhe khoi hui ra'naaiyan awaaz deti hain
Teri yaadein, teri parchhaiyan awaaz deti hain
Yeh qufl zang-alooda, yeh ghar ke band darwaze
Tere tark-e-watan ka dukh bhara afsana kehte hain
Munderon par yeh lehrate hue pur-haul sannate
Shikast-e-khwaab ki rudaad-e-gham dohrate rehte hain
Yahan har shaam mehrabon mein udti hain ababilein
Yahan pichhle pehar shabnam ke aansu roz bahte hain
Shabein aa kar guzar jaati hain, shamaein tak nahin jaltin
Sehar aa kar chali jaati hai, araaish nahin hoti
Pas parda kisi awaaz ke ghunghroo nahin bajte
Pas chilman kisi rukhsar ki tabish nahin hoti
Pas deewar lehrate nahin ab reshmi aanchal
Pas rozan nishaat-o-kaif ki barish nahin hoti
Woh talkhi shiddat-e-jazbaat ne bhar di hai rag rag mein
Ke tere gham mein roya hun to khud par muskuraya hun
Jo duniya kho gayi, main hun usi duniya mein awaara
Jo shamaein nazr-e-toofan ho gayin, main un ka saya hun
Na jaane ajnabi basti mein tera haal kya hoga
Main apne shehar ki galiyon mein hun lekin paraya hun
Diyar-e-ghair mein ab qaid hain woh reshmi jalwe
Jinhon ne meri rahon mein mah-o-anjum bikhere hain
Main samjha tha meri raaton mein chamkeinge tere aariz
Main samjha tha shahani chooriyon ke geet mere hain
Magar taqseem ne roohon ko bhi taqseem kar dala
Yahan bhi ghup andhere hain, wahan bhi ghup andhere hain
Mai jab bhi tere ghar ke paas se ho kar guzarta hu
Mujhe khoi hui ra'naaiyan awaaz deti hain
Teri yaadein, teri parchhaiyan awaaz deti hain
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں