میں پچھلی رات کیا جانے کہاں تھا — قیصر الجعفری
شاعر
میں پچھلی رات کیا جانے کہاں تھا
میں پچھلی رات کیا جانے کہاں تھا
دعاؤں کا بھی لہجہ بے زباں تھا
ہوا گم سم تھی سونا آشیاں تھا
پرندہ رات بھر جانے کہاں تھا
ہواؤں میں اڑا کرتے تھے ہم بھی
ہمارے سامنے بھی آسماں تھا
مری تقدیر تھی آوارہ گردی
مرا سارا قبیلہ بے مکاں تھا
مزے سے سو رہی تھی ساری بستی
جہاں میں تھا وہیں شاید دھواں تھا
میں اپنی لاش پر آنسو بہاتا
مجھے دکھ تھا مگر اتنا کہاں تھا
سفر کاٹا ہے کتنی مشکلوں سے
وہاں سایہ نہ تھا پانی جہاں تھا
کہاں سے آ گئی یہ خود نمائی
وہیں پھینک آؤ آئینہ جہاں تھا
میں قتل عام کا شاہد ہوں قیصرؔ
کہ بستی میں مرا اونچا مکاں تھا
قیصر الجعفری
Main pichhli raat kya jaane kahan tha
Main pichhli raat kya jaane kahan tha
Duaon ka bhi lahja be-zuban tha
Hawa gum sum thi soona ashiyan tha
Parinda raat bhar jaane kahan tha
Hawaon mein uda karte the hum bhi
Hamare samne bhi asman tha
Meri taqdeer thi awara-gardi
Mera sara qabeela be-makan tha
Maze se so rahi thi sari basti
Jahan main tha wahin shayad dhuan tha
Main apni lash par aansu bahata
Mujhe dukh tha magar itna kahan tha
Safar kaata hai kitni mushkilon se
Wahan saya na tha pani jahan tha
Kahan se aa gayi yeh khud-numai
Wahin phenk aao aaina jahan tha
Main qatl-e-aam ka shahid hoon Qaisar
Ke basti mein mera uncha makan tha
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں