نیا خون — قیصر الجعفری

Naya Khoon

Khaak par gir ke lahoo kaun-o-makaan tak pahuncha
Roshni ban ke mah-o-kehkashaan tak pahuncha
Arsh-e-azam ke pare loh-o-qalam se aage
Karbala se yeh lahoo jaane kahan tak pahuncha
Yeh lahoo ban ke jala raah-e-wafa mein qandeel
Kaarwaan marhala azm-e-jawaan tak pahuncha
Taazgi ban ke rag-e-lala-o-gul mein dauda
Abr ban ban ke biyabaan-e-tapaan tak pahuncha
Yeh lahoo chhed gaya silsila daar-o-rasan
Yeh lahoo aag ki soorat rag-e-jaan tak pahuncha
Jal gayi shama andheron ka jigar chaak hua
Yeh lahoo waqt ki lehron pe jahan tak pahuncha
Inqilabaat ki tareekh ka unwaan ban kar
Yeh lahoo qatl-gah-e-asr-e-rawaan tak pahuncha
Chara-gar aaye bahut koi maseeha na hua
Seena-e-arz ke zakhmon ka madaawa na hua
Karbala aaj bhi barpa hai ba-andaaz-e-digar
Dasht mein raqs-e-shaheedaan ka tamasha na hua
Band hai aaj bhi kitnon ke liye nehar-e-furaat
Ma'arka koi ba-zaahir lab-e-darya na hua
Zainabein apne gharon mein hain rida se mehroom
Dasht-o-kohsaar mein kheema kahin barpa na hua
Raat peeti hi rahi chand sitaron ka lahoo
Waqt ki teera fizaaon mein ujala na hua
Kon sa waqt hai phir rooh ki bedaari ka
Zakhm-e-ehsaas agar aaj bhi taaza na hua
Dil ko bedaar karein rooh ko bebaak karein
Asr-e-haazir ke yazeedon ki qaba chaak karein
Ashk be-sood rahe kusht-e-tamanna ke liye
Khoon-e-dil khoon-e-jigar se use namnaak karein
Mauj-e-khoon ghaza-e-rukhsar-e-umam hoti hai
Aao ab waqt ki awaaz ka idraak karein
Zer-e-mehrab nahin hoti mohabbat ki namaz
Saya-e-daar mein ik sajda bebaak karein