پچھتاوا — قیصر الجعفری
شاعر
پچھتاوا
در و دیوار پہ ہجرت کے نشاں دیکھ آئیں
آؤ ہم اپنے بزرگوں کے مکاں دیکھ آئیں
اپنی قسمت میں لکھے ہیں جو وراثت کی طرح
آؤ اک بار وہ زخم دل و جاں دیکھ آئیں
آؤ بھیگی ہوئی آنکھوں سے پڑھیں نوحۂ دل
آؤ بکھرے ہوئے رشتوں کا زیاں دیکھ آئیں
جس سے ٹکرا کے گرے تھے کبھی ارباب خرد
آؤ نزدیک سے وہ سنگ گراں دیکھ آئیں
وقت جاتے ہوئے کیا لکھ گیا پیشانی پر
آؤ آشفتگیٔ عہد رواں دیکھ آئیں
ٹوٹا ٹوٹا ہوا دل لے کے پھریں گلیوں میں
کچی مٹی کے کھلونوں کی دکاں دیکھ آئیں
روشنی کے کہیں آثار تو باقی ہوں گے
آؤ پگھلی ہوئی شمعوں کا دھواں دیکھ آئیں
جن درختوں کے تلے رقص صبا ہوتا تھا
سوکھے پتوں کا برسنا بھی وہاں دیکھ آئیں
اڑ رہے ہوں گے کہیں جھنڈ ابابیلوں کے
آؤ سنسان دریچوں کا سماں دیکھ آئیں
اب فرشتوں کے سوا کوئی نا آتا ہوگا
کون دیتا ہے خرابے میں اذاں دیکھ آئیں
مدتوں بعد مہاجر کی طرح آئے ہیں
روٹھ جائے نہ کھنڈر آؤ میاں دیکھ آئیں
قیصر الجعفری
Pachtawa
Dar-o-deewar pe hijrat ke nishan dekh aayen
Aao hum apne buzurgon ke makan dekh aayen
Apni qismat mein likhe hain jo virasat ki tarah
Aao ik baar woh zakhm-e-dil-o-jaan dekh aayen
Aao bheegi hui aankhon se padhen noha-e-dil
Aao bikhre hue rishton ka ziyan dekh aayen
Jis se takra ke gire the kabhi arbaab-e-khirad
Aao nazdeek se woh sang-e-giran dekh aayen
Waqt jaate hue kya likh gaya peshani par
Aao aashuftagi-e-ahd-e-rawaan dekh aayen
Toota toota hua dil le ke phiren galiyon mein
Kacchi mitti ke khilono ki dukan dekh aayen
Roshni ke kahin aasar to baqi honge
Aao pighli hui shamaon ka dhuan dekh aayen
Jin darakhton ke tale raqs-e-saba hota tha
Sookhe patton ka barsna bhi wahan dekh aayen
Ud rahe honge kahin jhund ababilein ke
Aao sunsaan darichon ka samaan dekh aayen
Ab farishton ke siwa koi na aata hoga
Kon deta hai kharaabe mein azan dekh aayen
Muddaton baad muhajir ki tarah aaye hain
Rooth jaye na khandhar aao miyan dekh aayen
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں