سادگی — قیصر الجعفری
شاعر
سادگی
میرے ماضی کا کوئی زخم مرے پاس نہیں
جس سے جو چیز ملی تھی اسے پھیر آیا ہوں
تیری زلفوں کے ستارے تری آغوش کے پھول
جانے کن راہ گزاروں میں بکھیر آیا ہوں
ہو گئی ہوگی بلند اور بلند اور بلند
میں ترے گرد جو دیوار سی گھیر آیا ہوں
تو مری راہ سے گزری تھی ستارے لے کر
میرے احساس پہ چھائے ہوئے سائے نہ گئے
تیری آنکھوں سے تو برسی تھی مئے ہوش ربا
خشک ہونٹوں سے یہ پیمانے لگائے نہ گئے
تیری پھیلی ہوئی بانہوں نے پکارا لیکن
دو قدم مجھ سے تری سمت اٹھائے نہ گئے
میں نے الفاظ کے پردے میں محبت ڈھونڈی
ارتعاش لب گل گوں کی صدا سن نہ سکا
میں نہ سمجھا تری خاموش نظر کا مفہوم
آنکھوں آنکھوں میں وہ اقرار وفا سن نہ سکا
میں نے انداز تمنا کو تغافل جانا
تیری بھیگی ہوئی پلکوں کا گلہ سن نہ سکا
آج جب زخم تمنا کا نشاں تک نہ رہا
تو مجھے زخم تمنا کی دوا یاد آئی
خاک اڑنے لگی جب روح کے ویرانے میں
تیری بکھری ہوئی زلفوں کی گھٹا یاد آئی
آج جب سوکھ گئے پھول ہی ارمانوں کے
تیرے مہکے ہوئے آنچل کی ہوا یاد آئی
قیصر الجعفری
Sādgi
Mere māzī kā koī zakhm mere pās nahīñ
Jis se jo chīz milī thī use pher āyā hūñ
Terī zulfon ke sitāre terī āghosh ke phūl
Jaane kin rāh-guzāroñ mein bikher āyā hūñ
Ho gaī hogī buland aur buland aur buland
Maiñ tere gird jo dīvār sī gher āyā hūñ
Tu mirī rāh se guzrī thī sitāre le kar
Mere ehsās pe chhā'e hu'e sā'e na ga'e
Terī āñkhoñ se to barsī thī mai-e-hosh-rubā
Khushk hoñṭoñ se yeh paimāne lagā'e na ga'e
Terī phailī huī bāñhoñ ne pukārā lekin
Do qadam mujh se terī simt uṭhā'e na ga'e
Maiñ ne alfāz ke parde mein mohabbat ḍhūñḍī
Irtia'āsh-e-lab-e-gul-gūñ kī sadā sun na sakā
Maiñ na samjhā terī khāmosh nazar kā mafhūm
Āñkhoñ āñkhoñ mein woh iqrār-e-wafā sun na sakā
Maiñ ne andāz-e-tamannā ko taghāful jānā
Terī bhīgī huī palkoñ kā gila sun na sakā
Āj jab zakhm-e-tamannā kā nishāñ tak na rahā
To mujhe zakhm-e-tamannā kī dawā yād āī
Khāk uṛne lagī jab rūh ke vīrāne mein
Terī bikhrī huī zulfon kī ghaṭā yād āī
Āj jab sūkh ga'e phūl hī armānoñ ke
Tere mahke hu'e āñchal kī havā yād āī
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں