تری بے وفائی کے بعد بھی مرے دل کا پیار نہیں گیا — قیصر الجعفری
شاعر
تری بے وفائی کے بعد بھی مرے دل کا پیار نہیں گیا
تری بے وفائی کے بعد بھی مرے دل کا پیار نہیں گیا
شب انتظار گزر گئی غم انتظار نہیں گیا
میں سمندروں کا نصیب تھا مرا ڈوبنا بھی عجیب تھا
مرے دل نے مجھ سے بہت کہا میں اتر کے پار نہیں گیا
تو مرا شریک سفر نہیں مرے دل سے دور مگر نہیں
تری مملکت نہ رہی مگر ترا اختیار نہیں گیا
اسے اتنا سوچا ہے روز و شب کہ سوال دید رہا نہ اب
وہ گلی بھی زیر طواف ہے جہاں ایک بار نہیں گیا
کبھی کوئی وعدہ وفا نہ کر یوں ہی روز روز بہانہ کر
تو فریب دے کے چلا گیا ترا اعتبار نہیں گیا
مجھے اس کے ظرف کی کیا خبر کہیں اور جا کے ہنسے اگر
مرے حال دل پہ تو روئے بن کوئی غم گسار نہیں گیا
اسے کیا خبر کہ شکستگی ہے جنوں کی منزل آگہی
جو متاع شیشۂ دل لیے سر کوئے یار نہیں گیا
مری زندگی مری شاعری کسی غم کی دین ہے جعفریؔ
دل و جاں کا قرض چکا دیا میں گناہ گار نہیں گیا
قیصر الجعفری
Teri bewafai ke baad bhi mere dil ka pyar nahin gaya
Teri bewafai ke baad bhi mere dil ka pyar nahin gaya
Shab-e-intezar guzar gayi gham-e-intezar nahin gaya
Main samundaron ka naseeb tha mera doobna bhi ajeeb tha
Mere dil ne mujh se bahut kaha main utar ke paar nahin gaya
Tu mera shareek-e-safar nahin mere dil se duur magar nahin
Teri mamlikat na rahi magar tera ikhtiyar nahin gaya
Use itna socha hai roz-o-shab ke sawal-e-deed raha na ab
Woh gali bhi zer-e-tawaf hai jahan ek baar nahin gaya
Kabhi koi wada wafa na kar yun hi roz roz bahana kar
Tu fareb de ke chala gaya tera aitbar nahin gaya
Mujhe us ke zarf ki kya khabar kahin aur ja ke hanse agar
Mere haal-e-dil pe to roye bin koi ghamgusar nahin gaya
Use kya khabar ke shikastagi hai junoon ki manzil-e-aagahi
Jo mata-e-sheesha-e-dil liye sar-e-kuye-e-yar nahin gaya
Meri zindagi meri shayari kisi gham ki dein hai Jafri
Dil-o-jaan ka qarz chuka diya main gunahgar nahin gaya
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں