وقت کی دھول — قیصر الجعفری
شاعر
وقت کی دھول
آج تو دفعتاً سامنے آ گئی
تیری رفتار باد صبا کی طرح
پندرہ سال کا درد مہکا گئی
میں سر راہ حیران سا رہ گیا
یاد ماضی کی شبنم برسنے لگی
اور میں دیر تک بھیگتا رہ گیا
چاندنی میں نہایا بدن تھا وہی
چھن رہی تھی وہی دودھیا روشنی
آئنہ آئنہ پیرہن تھا وہی
تیرے تیور ترے ناز ویسے ہی تھے
اب کسی اور کے واسطے ہی سہی
مسکرانے کے انداز ویسے ہی تھے
زندگی تیری خوش حال پہلے بھی تھی
وقت کی دھول تو صرف مجھ پر جمی
تو اسی طرح کچھ سال پہلے بھی تھی
بلکہ کچھ اور بھی دل نشیں ہو گئی
رنگ کھلتا گیا رخ نکھرتا گیا
میرے شعروں سے بڑھ کر حسیں ہو گئی
درد بے چہرگی جان پائی نہ تو
میرا احساس اک زخم سے بچ گیا
شکر ہے مجھ کو پہچان پائی نہ تو
قیصر الجعفری
Waqt Ki Dhool
Aaj tu dafatan saamne aa gayi
Teri raftaar baad-e-saba ki tarah
Pandrah saal ka dard mahka gayi
Mai sar-e-raah hairaan sa reh gaya
Yaad-e-maazi ki shabnam barasne lagi
Aur mai der tak bheegta reh gaya
Chandni mein nahaya badan tha wohi
Chhan rahi thi wohi doodhiya roshni
Aaina aaina pairahan tha wohi
Tere tevar tere naaz waise hi thhe
Ab kisi aur ke waaste hi sahi
Muskurane ke andaaz waise hi thhe
Zindagi teri khush-haal pehle bhi thi
Waqt ki dhool to sirf mujh par jami
Tu isi tarah kuch saal pehle bhi thi
Balke kuch aur bhi dil-nasheen ho gayi
Rang khulta gaya, rukh nikharta gaya
Mere sheroh se badh kar haseen ho gayi
Dard be-chehragi jaan paayi na tu
Mera ehsaas ik zakhm se bach gaya
Shukr hai mujhko pehchan paayi na tu
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں