وہی شکست سفر کا نشاں ہے چہرے پر — قیصر الجعفری
شاعر
وہی شکست سفر کا نشاں ہے چہرے پر
وہی شکست سفر کا نشاں ہے چہرے پر
بہت غبار پس کارواں ہے چہرے پر
نظر اٹھے بھی تو زخموں کی تاب لا نہ سکے
یہ آئنہ ہے کہ خنجر رواں ہے چہرے پر
خیال و خواب کے تاجر زباں سے کچھ نہ کہیں
لکھی تمام کتاب زیاں ہے چہرے پر
امید و بیم کی اک فصل رائیگاں ہوں میں
نظر میں پھول کھلے ہیں خزاں ہے چہرے پر
ملال جاں کی حقیقت کو کیا چھپاؤں میں
کہ حرف حرف وہی داستاں ہے چہرے پر
چلو کہ عذر ستم کی بھی قید ختم ہوئی
جو اک نقاب تھا وہ بھی کہاں ہے چہرے پر
پھر اس کے بعد بھی شاید ہوا چلی ہوگی
جو گرد اڑ کے پڑی تھی کہاں ہے چہرے پر
چھلک رہی ہے دل و جاں کی روشنی قیصرؔ
بجھی بجھی ہی سہی مہرباں ہے چہرے پر
قیصر الجعفری
Wohi Shikast-e Safar Ka Nishaan Hai Chehre Par
Wohi shikast-e safar ka nishaan hai chehre par
Bahut ghubaar pas-e carvaan hai chehre par
Nazar uthe bhi to zakhmon ki taab laa na sake
Yeh aaina hai ke khanjar rawaan hai chehre par
Khayal-o-khwab ke taajir zubaan se kuch na kahein
Likhi tamaam kitaab-e ziyaan hai chehre par
Umeed-o-beem ki ek fasl-e raaigaan hoon main
Nazar mein phool khile hain khizaan hai chehre par
Malal-e jaan ki haqeeqat ko kya chhupaaoon main
Ke harf harf wohi daastaan hai chehre par
Chalo ke uzr-e sitam ki bhi qaid khatm hui
Jo ek naqaab tha woh bhi kahaan hai chehre par
Phir us ke baad bhi shayad hawa chali hogi
Jo gard ud ke padi thi kahaan hai chehre par
Chhalak rahi hai dil-o-jaan ki roshni Qaisar!
Bujhi bujhi hi sahi meharbaan hai chehre par
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں