یہ وہ بستی ہی نہیں — قیصر الجعفری
شاعر
یہ وہ بستی ہی نہیں
زندگی تو مجھے کس موڑ پہ لے آئی ہے
خواب کھلتے تھے جہاں برف وہاں چھائی ہے
سو دریچے ہیں مگر شمع کسی پر بھی نہیں
چاند نکلے مری راتوں کا مقدر بھی نہیں
کیا کروں کیا نہ کروں ہاتھ میں پتھر بھی نہیں
شیش محلوں کو کوئی غم بھی نہیں ڈر بھی نہیں
لوگ گونگے ہیں بیاباں میں اذاں کیسے ہو
لوگ قاتل ہیں علاج غم جاں کیسے ہو
لوگ پتھر ہیں تو احساس زیاں کیسے ہو
کس کو فرصت ہے جو پوچھے کہ میاں کیسے ہو
رات جب ختم ہوئی تھی تو سحر لگتی تھی
روشنی راہ گزر راہ گزر لگتی تھی
زندگی کوچۂ جاناں کا سفر لگتی تھی
اپنی منزل کہیں جنت کے ادھر لگتی تھی
کچھ بھی آنکھوں میں نہیں اشک ندامت کے سوا
کچھ بھی دامن میں نہیں داغ ملامت کے سوا
کچھ بھی چہرے پہ نہیں گرد مسافت کے سوا
اپنی دوکان میں سب کچھ ہے محبت کے سوا
قیصر الجعفری
Yeh woh bastī hī nahīñ
Zindagī to mujhe kis moṛ pe le āī hai
Khwāb khulte the jahāñ barf wahāñ chhāī hai
Sau darīche hain magar sham'a kisī par bhī nahīñ
Chāñd nikle mirī rātoñ kā muqaddar bhī nahīñ
Kya karūñ kya na karūñ hāth mein patthar bhī nahīñ
Shīsh mahloñ ko koi gham bhī nahīñ ḍar bhī nahīñ
Log gūñge hain bayābāñ mein azān kaise ho
Log qātil hain ilāj-e-gham-e-jāñ kaise ho
Log patthar hain to ehsās-e-ziyāñ kaise ho
Kis ko fursat hai jo pūchhe ki miyāñ kaise ho
Rāt jab khatm huī thī to sahar lagtī thī
Raushnī rāhguzar rāhguzar lagtī thī
Zindagī kūcha-e-jānāñ kā safar lagtī thī
Apnī manzil kahīn jannat ke idhar lagtī thī
Kuchh bhī āñkhoñ mein nahīñ ashk-e-nadāmat ke sivā
Kuchh bhī dāman mein nahīñ dāgh-e-malāmat ke sivā
Kuchh bhī chehre pe nahīñ gard-e-musāfat ke sivā
Apnī dukān mein sab kuch hai mohabbat ke sivā
شاعر کے بارے میں
قیصر الجعفری اردو کے معروف اور ہر دل عزیز شاعر تھے جنہوں نے اپنی سادہ، درد انگیز اور عوامی لہجے کی شاعری سے غیر معمولی شہرت حاصل کی۔ ان کا اصل نام ...
مکمل تعارف پڑھیں