آئنے کا ساتھ پیارا تھا کبھی — شارق کیفی
شاعر
آئنے کا ساتھ پیارا تھا کبھی
آئنے کا ساتھ پیارا تھا کبھی
ایک چہرے پر گزارا تھا کبھی
آج سب کہتے ہیں جس کو ناخدا
ہم نے اس کو پار اتارا تھا کبھی
یہ مرے گھر کی فضا کو کیا ہوا
کب یہاں میرا تمہارا تھا کبھی
تھا مگر سب کچھ نہ تھا دریا کے پار
اس کنارے بھی کنارا تھا کبھی
کیسے ٹکڑوں میں اسے کر لوں قبول
جو مرا سارے کا سارا تھا کبھی
آج کتنے غم ہیں رونے کے لیے
اک ترے دکھ کا سہارا تھا کبھی
جستجو اتنی بھی بے معنی نہ تھی
منزلوں نے بھی پکارا تھا کبھی
یہ نئے گمراہ کیا جانیں مجھے
میں سفر کا استعارہ تھا کبھی
عشق کے قصے نہ چھیڑو دوستو
میں اسی میداں میں ہارا تھا کبھی
شارق کیفی
aaine ka sath pyara tha kabhi
aa.ine kā saath pyārā thā kabhī
ek chehre par guzārā thā kabhī
aaj sab kahte haiñ jis ko nāḳhudā
ham ne us ko paar utārā thā kabhī
ye mire ghar kī fazā ko kyā huā
kab yahāñ merā tumhārā thā kabhī
thā magar sab kuchh na thā dariyā ke paar
is kināre bhī kinārā thā kabhī
kaise TukḌoñ meñ use kar luuñ qubūl
jo mirā saare kā saarā thā kabhī
aaj kitne ġham haiñ rone ke liye
ik tire dukh kā sahārā thā kabhī
justujū itnī bhī be-mā'nī na thī
manziloñ ne bhī pukārā thā kabhī
ye na.e gumrāh kyā jāneñ mujhe
maiñ safar kā isti.āra thā kabhī
ishq ke qisse na chheḌo dosto
maiñ isī maidāñ meñ haarā thā kabhī
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں