عبادت کا سچ — شارق کیفی
شاعر
عبادت کا سچ
عبادت جان کر
بہت چکر لگائے اسپتالوں کے
بہت تیمارداری کی ہے بیماروں کی لیکن
جنوں اب بجھ رہا ہے
میں اب تھکنے لگا ہوں
تھکن اب اس قدر حاوی ہے مجھ پر
کہ وہ اسٹول میرے خواب میں آنے لگا ہے
سہارا دے کے بٹھلاتا ہوں میں جس پر
مریضوں کو برابر ڈاکٹر کے
یہ کام اب دوسروں پر چھوڑ دوں
وسیلہ بن کے خود
ثواب ان کو بھی تھوڑا لوٹنے دوں
جنہیں جنت میں میرے ساتھ ہونا چاہئے
سہارا دے کے مجھ کو لائیں گے جو اسپتالوں میں
مری جانب سے بولیں گے
مرا پرچا لگائیں گے
تسلی دے کے مجھ کو چین سے سگریٹ جلائیں گے
اور اگر قسمت ہوئی اچھی تو ممکن ہے
وہ نازک سانولی سی نرس
جس کو دیکھ کر میں اس عبادت کی طرف راغب ہوا تھا
ان کے ہاتھ آ جائے شاید
شارق کیفی
ibaadat ka sach
'ibādat jaan kar
bahut chakkar lagā.e aspatāloñ ke
bahut tīmārdārī kī hai bīmāroñ kī lekin
junūñ ab bujh rahā hai
maiñ ab thakne lagā huuñ
thakan ab is qadar haavī hai mujh par
ki vo stool mere ḳhvāb meñ aane lagā hai
sahārā de ke biThlātā huuñ maiñ jis par
marīzoñ ko barābar doctor ke
ye kaam ab dūsroñ par chhoḌ duuñ
vasīla ban ke ḳhud
savāb un ko bhī thoḌā lūTne duuñ
jinheñ jannat meñ mere saath honā chāhiye
sahārā de ke mujh ko lā.eñge jo aspatāloñ meñ
mirī jānib se boleñge
mirā parchā lagā.eñge
tasallī de ke mujh ko chain se cigarette jalā.eñge
aur agar qismat huī achchhī to mumkin hai
vo nāzuk sāñvlī sī nurse
jis ko dekh kar maiñ is 'ibādat kī taraf rāġhib huā thā
un ke haath aa jaa.e shāyad
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں