بات پھانسی کے دن کی نہیں — شارق کیفی
شاعر
بات پھانسی کے دن کی نہیں
آکسیجن کی ٹیوب
اور پھانسی کے پھندے میں ویسے بھی کیا فرق ہے
بات پھانسی یا پھانسی کے دن کی نہیں
موت کی بھی نہیں
بات تو لاش کے مضحکہ خیز لگنے کی ہے
فکر لاشے کی ہے
جانے کیسی لگے؟
ایک فٹ لمبی پتلی سی گردن
مرے اتنے بھاری بدن پر
اور زباں؟
وو جو سنتے ہیں اتنی نکل آئے گی منہ کے باہر
کالی مائی کی صورت
کہیں وو ڈرا تو نہیں دے گی بچوں کو میرے
اور وہ سب نیک انسان جو غسل دیں گے مرے جسم کو
سو بھی پائیں گے کیا چین سے؟
یا مرا بھوت ان کو ڈراتا رہے گا مہینوں تلک
میں نہیں چاہتا کوئی مجھ سے ڈرے
کوئی مجھ پر ہنسے
زندگی اک لطیفے کی صورت کٹی کچھ شکایت نہیں
ہاں مگر
لاش کی شکل میں مضحکہ خیز لگنے سے ڈرتا ہوں میں
بات اتنی سی ہے
بات پھانسی یا پھانسی کے دن کی نہیں
شارق کیفی
baat phansi ke din ki nahin
oxygen kī tube
aur phāñsī ke phande meñ vaise bhī kyā farq hai
baat phāñsī yā phāñsī ke din kī nahīñ
maut kī bhī nahīñ
baat to laash ke mazhaka-ḳhez lagne kī hai
fikr lāshe kī hai
jaane kaisī lage?
ek fuT lambī patlī sī gardan
mire itne bhārī badan par
aur zabāñ?
vo jo sunte haiñ itnī nikal aa.egī muñh ke bāhar
kālī-mā.ī kī sūrat
kahīñ vo Darā to nahīñ degī bachchoñ ko mere
aur vo sab nek insān jo ġhusl deñge mire jism ko
so bhī pā.eñge kyā chain se?
yā mirā bhuut un ko Darātā rahegā mahīnoñ talak
maiñ nahīñ chāhtā koī mujh se Dare
koī mujh par hañse
zindagī ik latīfe kī sūrat kaTī kuchh shikāyat nahīñ
haañ magar
laash kī shakl meñ maz.haka-ḳhez lagne se Dartā huuñ maiñ
baat itnī sī hai
baat phāñsī yā phāñsī ke din kī nahīñ
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں