بے تکلف مرا ہیجان بناتا ہے مجھے — شارق کیفی
شاعر
بے تکلف مرا ہیجان بناتا ہے مجھے
بے تکلف مرا ہیجان بناتا ہے مجھے
سامنے تیرے کہاں بولنا آتا ہے مجھے
وہ اداسی کہ بکھرنے سے نہیں بچ سکتا
اور ترا لمس کہ چنتا چلا جاتا ہے مجھے
اب مرے لوٹ کے آنے کا کوئی وقت نہیں
یوں بھی اب گھر سے سوا کون بلاتا ہے مجھے
گیت ہی صرف لبوں پر ہو تو آ جائے بھی نیند
وہ کوئی اور کہانی بھی سناتا ہے مجھے
قطع کر کے بھی تعلق وہ کہاں چین سے ہے
اس کے اسباب و دلائل بھی گناتا ہے مجھے
خود سے وہ کون سے شکوے ہیں کہ جاتے ہی نہیں
اپنے جیسوں پہ یقیں کیوں نہیں آتا ہے مجھے
اور اک بار ذرا چھیڑ مری روح کے تار
ان سروں میں تو کوئی اور بھی گاتا ہے مجھے
اک ترا درد ہے اچھے ہیں مراسم جس سے
بس وہی ہے کہ جو پلکوں پہ بٹھاتا ہے مجھے
میں کسی دوسرے پہلو سے اسے کیوں سوچوں
یوں بھی اچھا ہے وہ جیسا نظر آتا ہے مجھے
ہو سبب کچھ بھی مرے آنکھ بچانے کا مگر
صاف کر دوں کہ نظر کم نہیں آتا ہے مجھے
ناخداؤں نے تو خوش فہمیاں بخشی ہیں فقط
میں ہوں خطرے میں یہ طوفاں ہی بتاتا ہے مجھے
شارق کیفی
be-takalluf mera haijaan banata hai mujhe
be-takalluf mirā haijān banātā hai mujhe
sāmne tere kahāñ bolnā aatā hai mujhe
vo udāsī ki bikharne se nahīñ bach saktā
aur tirā lams ki chuntā chalā jaatā hai mujhe
ab mire lauT ke aane kā koī vaqt nahīñ
yuuñ bhī ab ghar se sivā kaun bulātā hai mujhe
giit hī sirf laboñ par ho to aa jaa.e bhī niiñd
vo koī aur kahānī bhī sunātā hai mujhe
qat' kar ke bhī ta'alluq vo kahāñ chain se hai
is ke asbāb-o-dalā.il bhī ginātā hai mujhe
ḳhud se vo kaun se shikve haiñ ki jaate hī nahīñ
apne jaisoñ pe yaqīñ kyuuñ nahīñ aatā hai mujhe
aur ik baar zarā chheḌ mirī ruuh ke taar
in suroñ meñ to koī aur bhī gaatā hai mujhe
ik tirā dard hai achchhe haiñ marāsim jis se
bas vahī hai ki jo palkoñ pe biThātā hai mujhe
maiñ kisī dūsre pahlū se use kyuuñ sochūñ
yuuñ bhī achchhā hai vo jaisā nazar aatā hai mujhe
ho sabab kuchh bhī mire aañkh bachāne kā magar
saaf kar duuñ ki nazar kam nahīñ aatā hai mujhe
nā-ḳhudāoñ ne to ḳhush-fahmiyāñ baḳhshī haiñ faqat
maiñ huuñ ḳhatre meñ ye tūfāñ hī batātā hai mujhe
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں