بچھڑ کر ہم اسی کے حق میں اچھا کر رہے تھے

بچھڑ کر ہم اسی کے حق میں اچھا کر رہے تھے
مگر اس کو یہ لگتا تھا کہ دھوکہ کر رہے تھے
ذرا سا فاصلہ بھی اک مصیبت ہو گیا تھا
کہ ہم ہر موڑ پر آرام اتنا کر رہے تھے
محبت کو ابھی رونے کا وقت آیا نہیں تھا
ابھی ہم دوسری باتوں پہ جھگڑا کر رہے تھے
خدا جانے یہ نیکی تھی کہ خود غرضی ہماری
بدل اپنا عبادت میں مہیا کر رہے تھے
جہاں والوں کو تم اپنی صفائی میں نہ لانا
جہاں والے تو مجھ پر بھی بھروسہ کر رہے تھے
بڑی سنجیدگی کے ساتھ اسٹیشن پہ اترے
وہی لڑکے جو رستہ بھر تماشہ کر رہے تھے
جہاں پر حکمرانی صرف تیرے درد کی تھی
وہاں اب دوسرے غم بھی علاقہ کر رہے تھے
کئی بیمار اتنے بے تکلف تھے کہ شارقؔ
ہمیں بھی ساتھ چلنے کا اشارہ کر رہے تھے

شارق کیفی

bichhaD kar hum usi ke haq mein achchha kar rahe the

bichhaḌ kar ham usī ke haq meñ achchhā kar rahe the
magar us ko ye lagtā thā ki dhoka kar rahe the
zarā sā fāsla bhī ik musībat ho gayā thā
ki ham har moḌ par ārām itnā kar rahe the
mohabbat ko abhī rone kā vaqt aayā nahīñ thā
abhī ham dūsrī bātoñ pe jhagḌā kar rahe the
ḳhudā jaane ye nekī thī ki ḳhud-ġharzī hamārī
badal apnā 'ibādat meñ muhayyā kar rahe the
jahāñ vāloñ ko tum apnī safā.ī meñ na laanā
jahāñ vaale to mujh par bhī bharosa kar rahe the
baḌī sanjīdgī ke saath station pe utre
vahī laḌke jo raste bhar tamāsha kar rahe the
jahāñ par hukmrānī sirf tere dard kī thī
vahāñ ab dūsre ġham bhī 'ilāqa kar rahe the
ka.ī bīmār itne be-takalluf the ki 'shāriq'
hameñ bhī saath chalne kā ishāra kar rahe the

شاعر کے بارے میں

شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...

مکمل تعارف پڑھیں

بچھڑ کر ہم اسی کے حق میں اچھا کر رہے تھے — شارق کیفی

شاعر