ہاتھ آتا تو نہیں کچھ پہ تقاضہ کر آئیں — شارق کیفی
شاعر
ہاتھ آتا تو نہیں کچھ پہ تقاضہ کر آئیں
ہاتھ آتا تو نہیں کچھ پہ تقاضہ کر آئیں
اور اک بار گلی کا تری پھیرا کر آئیں
نیند کے واسطے ویسے بھی ضروری ہے تھکن
پیاس بھڑکائیں کسی سائے کا پیچھا کر آئیں
لطف دیتی ہے مسیحائی پر اتنا بھی نہیں
جوش میں اپنے ہی بیمار کو اچھا کر آئیں
لوگ محفل میں بلاتے ہوئے کتراتے تھے
اب نہیں دھڑکا یہ خود سے کہ کہاں کیا کر آئیں
کاش مل جائے کہیں پھر وہی آئینہ صفت
نقش بے ربط بہت ہیں انہیں چہرہ کر آئیں
کتنی آسانی سے ہم اس کو بھلا سکتے ہیں
بس کسی طرح اسے دوسروں جیسا کر آئیں
یہ بھی ممکن ہے کہ ہم ہار سے بچنے کے لیے
اپنے دشمن کے کسی وار میں حصہ کر آئیں
بات ماضی کو الگ رکھ کے بھی ہو سکتی ہے
اب جو حالات ہیں ان پر کبھی چرچا کر آئیں
یہ بتا کر کہ یہ رونق تو ذرا دیر کی ہے
صاحب بزم کے ہیجان کو ٹھنڈا کر آئیں
کیا وجود اس کا اگر کوئی توجہ ہی نہ دے
ہم کہ جب چاہیں اسے بھیڑ کا حصہ کر آئیں
شارق کیفی
hath aata to nahin kuchh pa taqaza kar aaen
haath aatā to nahīñ kuchh pa taqāza kar aa.eñ
aur ik baar galī kā tirī pherā kar aa.eñ
niiñd ke vāste vaise bhī zarūrī hai thakan
pyaas bhaḌkā.eñ kisī saa.e kā pīchhā kar aa.eñ
lutf detī hai masīhā.ī par itnā bhī nahīñ
josh meñ apne hī bīmār ko achchhā kar aa.eñ
log mahfil meñ bulāte hue katrāte the
ab nahīñ dhaḌkā ye ḳhud se ki kahāñ kyā kar aa.eñ
kaash mil jaa.e kahīñ phir vahī ā.īna-sifat
naqsh be-rabt bahut haiñ inheñ chehra kar aa.eñ
kitnī āsānī se ham us ko bhulā sakte haiñ
bas kisī tarah use dūsroñ jaisā kar aa.eñ
ye bhī mumkin hai ki ham haar se bachne ke liye
apne dushman ke kisī vaar meñ hissa kar aa.eñ
baat maazī ko alag rakh ke bhī ho saktī hai
ab jo hālāt haiñ un par kabhī charchā kar aa.eñ
ye batā kar ki ye raunaq to zarā der kī hai
sāhib-e-bazm ke haijān ko ThanDā kar aa.eñ
kyā vajūd us kā agar koī tavajjoh hī na de
ham ki jab chāheñ use bhiiḌ kā hissa kar aa.eñ
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں