انتہا تک بات لے جاتا ہوں میں — شارق کیفی
شاعر
انتہا تک بات لے جاتا ہوں میں
انتہا تک بات لے جاتا ہوں میں
اب اسے ایسے ہی سمجھاتا ہوں میں
کچھ ہوا کچھ دل دھڑکنے کی صدا
شور میں کچھ سن نہیں پاتا ہوں میں
بن کہے آؤں گا جب بھی آؤں گا
منتظر آنکھوں سے گھبراتا ہوں میں
یاد آتی ہے تری سنجیدگی
اور پھر ہنستا چلا جاتا ہوں میں
فاصلہ رکھ کے بھی کیا حاصل ہوا
آج بھی اس کا ہی کہلاتا ہوں میں
چھپ رہا ہوں آئنے کی آنکھ سے
تھوڑا تھوڑا روز دھندلاتا ہوں میں
اپنی ساری شان کھو دیتا ہے زخم
جب دوا کرتا نظر آتا ہوں میں
سچ تو یہ ہے مسترد کر کے اسے
اک طرح سے خود کو جھٹلاتا ہوں میں
آج اس پر بھی بھٹکنا پڑ گیا
روز جس رستے سے گھر آتا ہوں میں
شارق کیفی
intiha tak baat le jata hun main
intihā tak baat le jaatā huuñ maiñ
ab use aise hī samjhātā huuñ maiñ
kuchh havā kuchh dil dhaḌakne kī sadā
shor meñ kuchh sun nahīñ paatā huuñ maiñ
bin kahe ā.ūñgā jab bhī ā.ūñgā
muntazir āñkhoñ se ghabrātā huuñ maiñ
yaad aatī hai tirī sanjīdgī
aur phir hañstā chalā jaatā huuñ maiñ
fāsla rakh ke bhī kyā hāsil huā
aaj bhī us kā hī kahlātā huuñ maiñ
chhup rahā huuñ aa.ine kī aañkh se
thoḌā thoḌā roz dhuñdlātā huuñ maiñ
apnī saarī shaan kho detā hai zaḳhm
jab davā kartā nazar aatā huuñ maiñ
sach to ye hai mustarad kar ke use
ik tarah se ḳhud ko jhuTlātā huuñ maiñ
aaj us par bhī bhaTaknā paḌ gayā
roz jis raste se ghar aatā huuñ maiñ
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں