جنازے میں تو آؤ گے نہ میرے — شارق کیفی

janaze mein to aaoge na mere

kabhī maiñ zindagī kī nāz-bardārī na kar paayā
hamesha biich meñ haa.il rahā ik ḳhvāb
pāgal ḳhvāb
sote jāgte jo dekhtā huuñ maiñ
ki sar hī sar janāze meñ haiñ mere
aur maiñ bānoñ kī na.ī ik chārpā.ī par sukūñ ke saath leTā hañs rahā huuñ
ik aisī bhiiḌ par
jo mujh ko kāñdhā dene ke liye aapas meñ jhagḌā kar rahī hai
mujhe ye zindagī pairoñ-tale jitnā kuchaltī hai
mirī is ḳhvāb se vābastagī baḌhtī hī jaatī hai
mire jaise kisī gumnām se ik shaḳhs kī āñkhoñ ne
aisā ḳhvāb kyuuñ dekhā
kahāñ dekhā
ye ḳhud mere liye bhī ik pahelī hai
magar hañsiye nahīñ is ḳhvāb par mere
mirā ye ḳhvāb hī to vo kaḌī hai
jo mujh ko zindagī se joḌtī hai
na jaane kab se vo fahrist maiñ tayyār karne lagā huuñ
likhe haiñ naam jis meñ aise logoñ ke
janāze meñ jinheñ honā hī honā chāhiye mere
so un logoñ se rishte bhī
bahut hamvār honā chāhiye mere
maiñ ye bhī jāntā huuñ
mujhe jis shaan se marne kī ḳhvāhish hai
vo mehnat māñgtī hai
kisī had tak bhī jhuk kar dushmanoñ se
sulh kar lene kī himmat māñgtī hai
mohabbat māñgtī hai
duā.eñ māñgtā huuñ zindagī kī is liye maiñ
ki mujh ko vo thoḌā vaqt mil jaa.e
na.e rishte banāne kā
ta.alluq gahre karne kā
vagarna kyuuñ bhalā aa.egā koī
maut ke din ghar pe mere
sanak kah lo ki pāgal-pan
idhar aa kar mirī ye dhun yahāñ tak baḌh ga.ī hai
ki ab maiñ dostoñ se
ḳhushī kī mahfiloñ meñ bhī ye aksar pūchh letā huuñ
janāze meñ to aaoge na mere?
yahāñ chāho to hañs sakte ho mujh par
magar lāshe pe to aañsū bahāoge na mere?
vo hañs dete haiñ merī baat par
aur maiñ kahīñ andar se jaise TuuT jaatā huuñ
magar jab bhī kabhī aisā huā hai
janāze ne mujhe kāñdhā diyā hai
mujhe jab bhī lagā aisā ki maiñ ab thak rahā huuñ
gir rahā huuñ
mire is ḳhvāb ne
mire apne janāze ne mujhe kāñdhā diyā hai