جھوٹ پر اس کے بھروسا کر لیا — شارق کیفی
شاعر
جھوٹ پر اس کے بھروسا کر لیا
جھوٹ پر اس کے بھروسا کر لیا
دھوپ اتنی تھی کہ سایا کر لیا
اب ہماری مشکلیں کچھ کم ہوئیں
دشمنوں نے ایک چہرا کر لیا
ہاتھ کیا آیا سجا کر محفلیں
اور بھی خود کو اکیلا کر لیا
ہارنے کا حوصلہ تو تھا نہیں
جیت میں دشمن کی حصہ کر لیا
منزلوں پر ہم ملیں یہ طے ہوا
واپسی میں ساتھ پکا کر لیا
ساری دنیا سے لڑے جس کے لیے
ایک دن اس سے بھی جھگڑا کر لیا
قرب کا اس کے اٹھا کر فائدہ
ہجر کا ساماں اکٹھا کر لیا
گفتگو سے حل تو کچھ نکلا نہیں
رنجشوں کو اور تازہ کر لیا
مول تھا ہر چیز کا بازار میں
ہم نے تنہائی کا سودا کر لیا
شارق کیفی
jhuT par uske bharosa kar liya
jhuuT par us ke bharosā kar liyā
dhuup itnī thī ki saayā kar liyā
ab hamārī mushkileñ kuchh kam huiiñ
dushmanoñ ne ek chehrā kar liyā
haath kyā aayā sajā kar mahfileñ
aur bhī ḳhud ko akelā kar liyā
hārne kā hausla to thā nahīñ
jiit meñ dushman kī hissa kar liyā
manziloñ par ham mileñ ye tai huā
vāpsī meñ saath pakkā kar liyā
saarī duniyā se laḌe jis ke liye
ek din us se bhī jhagḌā kar liyā
qurb kā us ke uThā kar fā.eda
hijr kā sāmāñ ikaTThā kar liyā
guftugū se hal to kuchh niklā nahīñ
ranjishoñ ko aur taaza kar liyā
mol thā har chiiz kā bāzār meñ
ham ne tanhā.ī kā saudā kar liyā
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں