کہاں سوچا تھا میں نے بزم آرائی سے پہلے — شارق کیفی
شاعر
کہاں سوچا تھا میں نے بزم آرائی سے پہلے
کہاں سوچا تھا میں نے بزم آرائی سے پہلے
یہ میری آخری محفل ہے تنہائی سے پہلے
بس اک سیلاب تھا لفظوں کا جو رکتا نہیں تھا
یہ ہلچل سطح پہ رہتی ہے گہرائی سے پہلے
بہت دن ہوش مندوں کے کہے کا مان رکھا
مگر اب مشورہ کرتا ہوں سودائی سے پہلے
فقط رنگوں کے اس جھرمٹ کو میں سچ مان لوں کیا
وہ سب کچھ جھوٹ تھا دیکھا جو بینائی سے پہلے
کسی بھی جھوٹ کو جینا بہت مشکل نہیں ہے
فقط دل کو ہرا کرنا ہے سچائی سے پہلے
یہ آنکھیں بھیڑ میں اب تک اسی کو ڈھونڈتی ہیں
جو سایا تھا یہاں پہلے تماشائی سے پہلے
شارق کیفی
kahan socha tha maine bazm-arai se pahle
kahāñ sochā thā maiñ ne bazm-ārā.ī se pahle
ye merī āḳhirī mahfil hai tanhā.ī se pahle
bas ik sailāb thā lafzoñ kā jo ruktā nahīñ thā
ye halchal sat.h pe rahtī hai gahrā.ī se pahle
bahut din hosh-mandoñ ke kahe kā maan rakkhā
magar ab mashvara kartā huuñ saudā.ī se pahle
faqat rañgoñ ke is jhurmuT ko maiñ sach maan luuñ kyā
vo sab kuchh jhuuT thā dekhā jo bīnā.ī se pahle
kisī bhī jhuuT ko jiinā bahut mushkil nahīñ hai
faqat dil ko harā karnā hai sachchā.ī se pahle
ye āñkheñ bhiiḌ meñ ab tak usī ko DhūñDtī haiñ
jo saayā thā yahāñ pahle tamāshā.ī se pahle
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں