کہیں نہ تھا وہ دریا جس کا ساحل تھا میں — شارق کیفی
شاعر
کہیں نہ تھا وہ دریا جس کا ساحل تھا میں
کہیں نہ تھا وہ دریا جس کا ساحل تھا میں
آنکھ کھلی تو اک صحرا کے مقابل تھا میں
حاصل کر کے تجھ کو اب شرمندہ سا ہوں
تھا اک وقت کہ سچ مچ تیرے قابل تھا میں
کس احساس جرم کی سب کرتے ہیں توقع
اک کردار کیا تھا جس میں قاتل تھا میں
کون تھا وہ جس نے یہ حال کیا ہے میرا
کس کو اتنی آسانی سے حاصل تھا میں
ساری توجہ دشمن پر مرکوز تھی میری
اپنی طرف سے تو بالکل ہی غافل تھا میں
جن پر میں تھوڑا سا بھی آسان ہوا ہوں
وہی بتا سکتے ہیں کتنا مشکل تھا میں
نیند نہیں آتی تھی سازش کے دھڑکے میں
فاتح ہو کر بھی کس درجہ بزدل تھا میں
گھر میں خود کو قید تو میں نے آج کیا ہے
تب بھی تنہا تھا جب محفل محفل تھا میں
شارق کیفی
kahin na tha wo dariya jis ka sahil tha main
kahīñ na thā vo dariyā jis kā sāhil thā maiñ
aañkh khulī to ik sahrā ke muqābil thā maiñ
hāsil kar ke tujh ko ab sharminda sā huuñ
thā ik vaqt ki sach-much tere qābil thā maiñ
kis ehsās-e-jurm kī sab karte haiñ tavaqqo
ik kirdār kiyā thā jis meñ qātil thā maiñ
kaun thā vo jis ne ye haal kiyā hai merā
kis ko itnī āsānī se hāsil thā maiñ
saarī tavajjoh dushman par markūz thī merī
apnī taraf se to bilkul hī ġhāfil thā maiñ
jin par maiñ thoḌā sā bhī āsān huā huuñ
vahī batā sakte haiñ kitnā mushkil thā maiñ
niiñd nahīñ aatī thī sāzish ke dhaḌke meñ
fāteh ho kar bhī kis darja buzdil thā maiñ
ghar meñ ḳhud ko qaid to maiñ ne aaj kiyā hai
tab bhī tanhā thā jab mahfil mahfil thā maiñ
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں